BIROVLARGA

Muhabbatda ishlarim hech yurishmadi,
Ikki oshiq maqsadiga erishmadi...
Mensimayin qizin bizga berishmadi,
Zar choʻponlar kiydirishib kuyovlarga,
Qizingizni beravering birovlarga...

Koʻrmaganda sogʻinardik izlar edik,
Ismini ham erkalatib sizlar edik...
Bir birini jondan sevgan bizlar edik,
Qizingizni beravering birovlarga...

Barchasini bilib yoʻqdek hech gardingiz,
Sevganinga beramiz deb aytardingiz,
Bugun esa sovchilarim qaytardingiz,
Qizingizni beravering birovlarga...

Yuragimning bir chekkasin oʻyib oʻyib,
Kulib turib kuydirdingiz oʻtlar qoʻyib.
Farzandingiz baxtsiz qilib baxtga toʻyib,
Qizingizni beravering birovlarga...

Boshimizga tushdi hijron degan toshlar,
Mayli Xudo bizni ham bir yoʻlga boshlar,
Muhabbatni tushunmagan bagʻritoshlar,
Qizingizni beravering birovlarga...

Kulib qarab yuragimda olovlarga,
Zar choʻponlar kiydirishib kuyovlarga,
Muhabbatni tushunmagan bagʻritoshlar,
Qizingizni beravering birovlarga...

✍ Odilbek Qodirov

❤️ 𝗞𝗮𝗻𝗮𝗹 | 𝙾𝚍𝚒𝚕𝚋𝚎𝚔 𝚀𝚘𝚍𝚒𝚛𝚘𝚟