Deputatlik soʻroviga koʻra, kuni kecha Respublika oliy taʼlim Kengashining nodavlat oliy taʼlim tashkilotlari tomonidan Oliy taʼlim muassasalarini rivojlantirish jamgʻarmasiga toʻlov-kontrakt shaklida oʻqitishdan tushadigan mablagʻlarning 4 foizini oʻtkazish boʻyicha chiqarilgan bayonnomasi ijtimoiy tarmoqlarda keng muhokamalarga sabab boʻlmoqda.
Shuni alohida taʼkidlash lozimki, tadbirkorlik faoliyati erkinligi qonunlarimizga muvofiq kafolatlangan, hech bir tashkilot qonunga asoslanmay turib, tadbirkorlik subyektlariga, shu jumladan, nodavlat oliy taʼlim muassasalariga turli toʻlovlar joriy qilish vakolatiga ega emas.

Shuningdek, mazkur holat sohaga xorijiy investitsiyalarni keng jalb etish, oliy taʼlim tizimini Markaziy Osiyoda xalqaro taʼlim dasturlarini amalga oshiruvchi “xab”ga aylantirish kabi islohotlarga salbiy taʼsir qilishi mumkin.

Shu sababli, deputat D.Artikov Oliy taʼlim, fan va innovatsiyalar vaziri va Bosh prokurordan respublika oliy taʼlim Kengashining nodavlat oliy taʼlim tashkilotlari tomonidan Oliy taʼlim muassasalarini rivojlantirish jamgʻarmasiga toʻlov-kontrakt shaklida oʻqitishdan tushadigan mablagʻlarning 4 foizini oʻtkazish boʻyicha chiqarilgan bayonnomaning qonunchilik hujjatlariga muvofiqligi yuzasidan qayta koʻrib chiqish boʻyicha asoslantirilgan tushuntirish berish hamda oʻz nuqtayi nazarini bayon etishini soʻragan.