Muhaddis.uz | Расмий канал

Ўғлим Эдиқутга

Узун эт Худо Эдиқут* умрини,
Ёритқил анинг илм ила кўнглини.

Йигитлик янгидин етибдур санго,
Эрурсан чечак турганидек манго.

Кўзинг оч, мунинг қадрини сақлағил,
Ватаннинг қора тарихин оқлағил.

Йигитлик ўхшаб кетар худди баҳор,
Баҳорда уруғ сочса ҳосил топар.

Ва лекин баҳор ҳар йил келгуси,
Бу ёшлик ўтар бўлса ким кўргуси?

Илм нурин қўлға олғил - чироғ,
Топилмайди ҳаргиз бу янглиғ яроғ.

Керакдур ҳаётинг учун илм-фан,
Мунинг бирла душман олибдур Ватан.

Удирким диёнатдин айрилмағил,
Ўзингни ҳалокатга колдирмағил!

Отанг Соғунийдин бу сўз, англағил,
Кўнгил сандуғида муни сақлағил.

Алихонтўра Соғуний, 1964-йил, Тошкент

* Эдиқут (Қутлуғхон) - Соғунийнинг кенжа ўғли

Telegram | Facebook | Instagram | Twitter | Tiktok | YouTube

Ахлоқ ва насиҳат

Уч нарсадур мунофиқлар белгиси,
Мўмин одам ондин йироқ бўлғуси.

Биринчиси, ёлғон қўшар сўзига,
Ваъда бузар, боқма қаро юзига.

Учинчиси, қўйса биров омонат,
Сақламагай, қилғай анга хиёнат.

Бўлса агар бу уч хислат ҳар кимда,
Мунофиқдур чини билан, шарманда.

Бўлса бири ё иккинси гар мундин,
Мунофиқлик хислатидур, қоч ундин.

Расулуллоҳ бу сўзларни айдилар,
Ҳақ сўзини бизга сабоқ бердилар.

Алихонтўра Соғуний, 1965-йил, Тошкент
t.me/muhaddisuz

#Vaqt_qadri

Манфаатларнинг вақтдан келиб чиқиши, уни зое қилган кимса ҳеч қачон ўрнини тўлдира олмаслиги

Имом Ибн Каййум «Жавабул кафий лиман саъала ан даваиш шафий» китобида қуйидагиларни айтган: «Фикрларнинг энг олийси, энг буюги ва энг манфаат- лиси Аллох ва охират учун бўлганидир. Аллоҳ учун фикрлашнинг бир қанча навлари бор... бешинчи нав: вактнинг вожиби ва вазифаси ҳақида фикрлаш ҳамда бутун диққат-эътиборини унга қаратишдир. Буни билган киши ўз вақтини ғанимат билиши аниқ. Чунки у вактни зое кетказса, ҳамма манфаатларни зое қилган бўлади. Зеро, барча манфаатлар вақтдан келиб чиқади. Кимки вактни зое қилса, ҳеч қачон унинг жойини тўлдира олмайди!
Имом Шофеъий раҳматуллоҳи алайҳ айтади: «Мен сўфийлар билан бирга юриб, улардан икки сузни истифода қилдим:
1. «Вақт қиличдир, агар сен уни кесмасанг у сени кесади».
2. «Нафсингни агар ҳақ билан машғул қилмасанг, у сени ботил билан машғул қилади».


Абдул Фаттоҳ Абу Ғудданинг “Уламолар наздида вақтнинг қадри” китобидан

t.me/muhaddisuz

🏆 “Имом Мотуридий кубоги” спорт мусобақаларида шарафли 2-ўрин!

🗓 Жорий йил 26-май куни “Спорт – тинчлик элчиси” шиори остида Ўзбекистон халқаро исломшунослик академиясида “Имом Мотуридий кубоги” спорт мусобақалари бўлиб ўтди.

🤝Мусобақалар юртимиздаги олий диний таълим муассасалари ўртасида турли спорт йўналишларида ташкил этилди.

⚽️ Ҳадис илми мактаби талабалари мини-футбол ва волейбол спорт турлари бўйича фаол иштирок этиб, икки йўналишда шарафли иккинчи ўринни қўлга киритишди!

🔅 Бу натижалар талабаларимизнинг жисмоний фаоллиги, жамоавий ишлаш қобилияти ва юксак интизомга эга эканини яна бир бор намоён этди.

🔊 Ғолиб талабаларимизни табриклаймиз ва келгуси мусобақаларда янада улкан ютуқлар тилаймиз!

t.me/muhaddisuz

Аллоҳ бекорга Мадинада олиб қолмайди

Нега китоб кўп, олим кам биласизми? Чунки исломда олимлик китобдаги маълумотлар эмас, балки ўша илмлар билан яшаш, зийнатланиш ҳисобланади. Нега мусулмон инсоннинг қалби олимларга талпинади? Чунки уларда Расулуллоҳнинг сиймоси бўлади. Расулуллоҳга қизиққан инсонгина аҳли илмларни танишга қизиқади.
Кеча вафот этган устоз Раббимқули домла ҳам Расулуллоҳнинг меросхўрлари эдилар. У зотга сўзда ва амалда эргашган уммат эдилар.
Али розияллоҳу анҳу айтадилар: Расулуллоҳ соллаллоҳу алайҳи васалламни биринчи марта кўрган инсон у зотдан қўрқар эди. Яқиндан танигач, яхши кўриб қоларди” (Термизий “Шамоил”да ривоят қилган). Дарҳақиқат, Раббимқули домла ҳам худди шу сифат билан зийнатланган эдилар. Ўн дақиқа гаплашган одам у кишини яхши кўриб қолар эди.
Ҳинд бинти Абу Ҳола айтади: “Расулуллоҳ соллаллоҳу алайҳи васаллам кўзларини кўпроқ пастга қаратар эдилар. Аксар назарлари тааммул бўларди” (Термизий “Шамоил”да ривоят қилган). Раббимқули устоз ҳам ўзидан ёши, илми, мавқеи анча қуйида бўлган одам билан гаплашсалар ҳам кўзига тик қарамас, назарларини тааммул ила пастга қаратар эдилар. Ўзлари гапирганлари ё ўзгани эшитаётганларида унга боқардилар.
Домла фурсатни ғанимат билардилар. Ҳатто намоздан кейин дуо қилганларида ҳам бир ҳадис матнини айтиб, уни таржима қилиб, бироз шарҳлаб берардилар. Бир неча сонияларни ҳам дин хизматидан холи ўтказмасдилар. Дин ходими шундай бўлади. Бу буюк уламоларнинг суннати эди.
Иёз ибн Ҳимор розияллоҳу анҳу айтади: Расулуллоҳ соллаллоҳу алайҳи васаллам: Аллоҳ “Тавозели бўлинглар” деб менга ваҳий қилди” дедилар (Абу Довуд ривояти).
Раббимқули домла обрўли, илмли, ўзига тўқ бўлишларига қарамасдан жуда камтар одам эдилар. Одатда инсон домлада жамланган мазкур нарсалардан биттасига эга бўлиб қолса ҳам босар тусарини билмай қолади. Аммо домла ҳамма жиҳатдан мақтанишга арзигули ҳолатда бўлсалар ҳам камтарин одам эдилар. Аллоҳнинг “Тавозели бўлинглар” деган хитобига амал қилган мусулмон эдилар.
Расулуллоҳ соллаллоҳу алайҳи васаллам Мунзир ибн Оизга: “Сенда Аллоҳ яхши кўрадиган икки хислат бор экан: ҳалимлик-босиқлик ва салобат”, деганлар. У киши: “Мен бу хислатларни ўзим касб қилганманми ё Аллоҳ мени шундай яратганми?”, деди. Расулуллоҳ соллаллоҳу алайҳи васаллам: “Аллоҳ сени шундай яратган”, дедилар (Муслим ривояти).
Дарҳақиқат, Раббимқули домлада ҳам айни шу икки хислат топиларди. У кишидек ҳалим, вазмин одамни кўрмаганмиз. Бир оғиз ҳам бировга қўпол гапирмасдилар. Шу билан бирга шошиб иш қилмас, виқор ва салобатли аҳли илм эдилар.
Абу Саид Худрий розияллоҳу анҳу: "Расулуллоҳ соллаллоҳу алайҳи васаллам гўшангасидаги келиндан ҳам ҳаёлироқ эдилар”, деган (Аҳмад ривояти). Дарҳақиқат, Раббимқули домланинг сийратларига боққан инсон Расулуллоҳнинг мана шу ҳадисда назарда тутилган ҳаёларига гувоҳ бўларди. Насиб қилганлар гувоҳ бўлиб қолди...
Жобир розияллоҳу анҳу айтади: Расулуллоҳ соллаллоҳу алайҳи васаллам: “Менга энг суюкли ва қиёматда энг ўрни яқинингиз хулқингиз гўзал бўлганингиздир” дедилар (Термизий ривояти).
Аллоҳ таоло нега Раббимқули домламизни (роҳимаҳуллоҳ) Расулуллоҳнинг ёнларида олиб қолганини бироз тушунгандек бўлдик. Шояд биз ҳам домладек ахлоқли бўлсак, Мадинада қўним топармиз...

Абдулбосит Абдулвоҳид ўғли,
Ҳадис илми мактаби ўқитувчиси
t.me/muhaddisuz

#Solihlar_gulshani

Ҳали Раббимнинг ибодатига тўймаган эдим

Абу Айёш Қаттон айтади: “Басрада Мунийба исмли аёл яшар эди. Унинг ўзидан ҳам ибодатлироқ қизи бор эди. Ҳасан Басрий ўша қизни кўриб, ёш бўла туриб ибодатга бунчалик берилганидан таажжубга тушган эди.

Бир куни Ҳасан Басрийнинг ёнига бир киши келиб: “Фалончи қизни танирмидингиз? Ўша ҳозир жон талвасасида ётибди экан”, деди. Ҳасан Басрий ўрнидан сакраб туриб, унинг олдига борди. Қиз Ҳасан Басрийни кўриб, йиғлаб юборди. Ҳасан Басрий: “Нега йиғлайсан, синглим?” деди.
У: “Шу ёшимда юзига тупроқ ториладиган бўлди. Мен эса ҳали Раббимнинг ибодатига тўймаган эдим. Эй Абу Саид, онамни қаранг, отамга мен учун кенгроқ қабр қазиб, чиройли кафан танлашни буюряптилар. Аллоҳга қасам, Маккага тайёргарлик кўраётган бўлсам ҳам, кўп кўз ёш тўккан бўлардим. Қандай қилиб қабр зулмати ва қўрқинчига, қурт-қумурсқалар маконига тайёргарлик кўриб турганимда йиғламайин?” деди”.


Ҳоний ал-Ҳажнинг “Солиҳлар гулшани” китобидан


t.me/muhaddisuz

“Sport – tinchlik elchisi” shiori ostidagi musobaqalarning g‘olib va sovrindorlari taqdirlandi

💠O‘zbekiston xalqaro islomshunoslik akademiyasida ilk marotaba “Sport – tinchlik elchisi” shiori ostida o‘tkazilgan “Imom Moturidiy kubogi” sport musobaqalari yuqori kayfiyatda bo‘lib o‘tdi.

💠Tadbir davomida musobaqalar yakuniga bag‘ishlangan tantanali marosim o‘tkazildi. Unda g‘olib va sovrindorlar taqdirlandi. Ularga diplom, medal, kubok va esdalik sovg‘alari taqdim etildi.

Telegram | Facebook | Instagram | Twitter | Tiktok | YouTube