Viloyat hokimi Muborak tumanida: tadbirkorlik va ijtimoiy masalalar o‘rganildi

Bugun, 6-fevral kuni Qashqadaryo viloyati hokimi Murotjon Azimov Muborak tumaniga tashrif buyurib, hududdagi tadbirkorlik, aholi bandligini ta’minlash, xotin-qizlar muammolarini hal etish va tomorqalardan samarali foydalanish borasidagi ishlar bilan yaqindan tanishdi.

Tashrif davomida viloyat rahbari, avvalo, "Qoraqum" mahallasida tuyachilik bilan shug‘ullanayotgan tadbirkorning faoliyatini ko‘zdan kechirdi. Ushbu tadbirkor shifobaxsh tuya suti orqali bemorlarni davolash bilan shug‘ullanib kelmoqda. U endilikda zamonaviy sanatoriya qurish rejalari ustida ishlamoqda. Viloyat hokimi bu borada o‘z tavsiyalarini berib, loyihani sifatli va samarali amalga oshirish bo‘yicha takliflar bildirdi.

Shuningdek, Muborak tumanida issiqxonalardan unumli foydalanayotgan tadbirkorlarning faoliyati o‘rganildi. Gulchilik, pomidor va bodring yetishtirish yo‘lga qo‘yilgani bilan birga, parrandachilik ham rivojlantirilmoqda. Bu orqali nafaqat tuxum va tovuq go‘shti yetishtirilmoqda, balki aholi bandligi ham ta’minlanmoqda. Viloyat hokimi tadbirkorlar bilan muloqot qilib, ularning taklif va muammolarini tingladi.

Tashrif davomida "Bobur" va "Bo‘ston" mahallalarida mahalla yettiligining faoliyati tahlil qilindi. Mahallalarda obodonlashtirish va ko‘kalamzorlashtirish ishlarining borishi o‘rganilib, "Yashil makon" umummilliy loyihasi doirasida amalga oshirilishi lozim bo‘lgan ustuvor vazifalar belgilandi. Mas’ullarga ushbu yo‘nalishda aniq topshiriqlar berildi.

Viloyat hokimi hududdagi ijtimoiy masalalarga ham alohida e’tibor qaratib, sektor rahbarlariga har bir mahallada ishsiz fuqarolar bandligini ta’minlash, xotin-qizlar muammolarini joyida hal etish bo‘yicha tegishli topshiriqlar berdi.

Kanalga obuna bo‘ling:
👉https://t.me/muborakinfo