***

Uchrashuvga oshiqadi dugonang, 
Ko‘zlar visol orzusida charaqlab... 
— Bolam, choying sovib qoldi, — der onang, 
O‘ltirasan uyda kitob varaqlab. 
Hali sevgi deb atalgan bastakor
Yuragingda torlar chertib o‘tmagan, 
Hali hech kim gullar tutib navbahor,
Seni visol bog‘larida kutmagan.
Kechalaring osudadir, bir odam — 
Yodi bilan band bo‘lmagan o‘ylaring... 
«Yosh Verter»ni o‘qib bir kun meni ham — 
Sevarmikan kimdir deya o‘ylading. 
Gʻoyibona yo‘llaringga intizor, 
Allakimning kutishini bilmaysan. 
Derazangni chertib senga ilk bahor, 
Bir dasta gul tutishini bilmaysan. 
Sen ham uni, u ham seni ko‘rmagan, 
Qayerdadir yashar lekin dunyoda. 
Bog‘lar kezib hech gulga yuz burmagan, 
U sen uchun har kimdan ham ziyoda... 
Uchrashuvga oshiqadi dugonang, 
Qalb orziqib, yor oldiga chopadi... 
Qayerdadir seni izlar parvonang, 
U albatta seni izlab topadi.

© Erkin Vohidov