Tadbirda viloyat hokimi vazifasini bajaruvchi Ulug‘bek Mustafoyev ishtirok etdi va "Siz azizlarni, sizlarning timsolingizda jonajon Jizzaximizning barcha xotin-qizlarini 8 mart – Xalqaro xotin-qizlar kuni bilan muborakbod etaman. Joriy yilda bu ayyom muborak Ramazon oyida nishonlanayotgani ham o‘zgacha ma’noga ega. Zotan, muqaddas islom dini ham ayollarni, onalarni e’zozlash va qadrlashga chaqiradi," deb barchani samimiy muborakbod etdi.

Hayotimizga mazmun bag‘ishlaydigan, odamiylik, mardlik, oliyjanoblik sari yo‘l ko‘rsatadigan, sabr-toqat va sadoqat sohibasi bo‘lgan ayolning mehr-muhabbati va zahmatini hech narsa bilan o‘lchab bo‘lmaydi. To‘maris, Nodirabegim, Gulbadanbegim, Uvaysiy, Zulfiya, Saida Zunnunovadek buyuk ayollarimiz jasorati xalqimiz tarixini yorug‘ nur kabi yoritib turibdi. Ulug‘ momolarimizga xos bo‘lgan noyob fazilatlar zamonamiz ayollari siymosida ham davom etayotganidan faxrlanamiz.

Bugun yurtimiz va viloyatimizning sharafini yuksaltirishga o‘z hissasini qo‘shayotgan, halol va samarali mehnatlari bilan e’tirofga sazovor bo‘layotgan xotin-qizlar soni tobora ortib borayotgani barchamizni quvontiradi. Jamiyatda gender tengligini ta’minlashga qaratilayotgan davlat siyosati natijasi o‘laroq, davlat boshqaruvi va jamiyatning barcha jabhalarida xotin-qizlarning faolligini oshirish borasida keng ko‘lamli islohotlar amalga oshirilmoqda.

Tantanali tadbirda turli sohalarda mehnat qilayotgan faol xotin-qizlar esdalik ko‘krak nishoni va viloyat hokimi faxriy yorlig‘i bilan taqdirlandi.

Tadbirda san’at ahlining chiqishlari mehmonlarni xushnud etdi.