26-dekabr kuni Nukus voqealari boʻyicha tuzilgan komissiya Oliy Majlis palatalariga oʻz axborotini taqdim qildi. Asosiy tezislar:

2022-yil iyul oyida Nukusda roʻy bergan tartibsizliklar qatnashchilarining 943 nafari huquqbuzarliklar sodir etganligi uchun ogohlantirilgan, 6 ming 135 nafar shaxsga maʼmuriy jarima, 2 639 nafar qatnashchiga esa maʼmuriy qamoq jazosi belgilangan, 61 nafari jinoyatlar sodir etganligi aniqlangan.

Jinoyat ishi doirasida sudgacha qamoqqa olingan jami 168 nafar shaxsning 107 nafari (2 nafar ayol) Komissiya iltimosnomasiga koʻra oilasiga qaytarilgan, 30 nafar sudlanuvchi komissiya iltimosiga koʻra sud zalidan ozod etilgan.

Ommaviy tartibsizliklar davomida 21 nafar fuqaro (2 nafari huquqni muhofaza qilish idorasi xodimi) vafot etgan, 413 kishi jarohatlangan, shundan 183 nafari huquqni muhofaza qiluvchi organ xodimlari.

Komissiyaga koʻra, huquqni muhofaza qiluvchi idoralar tomonidan ommaviy tartibsizliklarni maʼmuriy binolardan uzoqlashtirish, va tarqatib yuborish maqsadida suv va rangli suyuqlik purkovchi texnika, koʻzdan yosh oqizuvchi maxsus granatalardan foydalanilgan.

Fuqarolar va davlat idoralarining mol-mulkiga katta miqdorda 6,8 milliard soʻm moddiy zarar yetgan.

Tartibsizliklarni bartaraf etishda inson huquqlari buzgan 3 nafar ichki ishlar organlari xodimlari jinoiy javobgarlikka tortilgan.

👉 @kunonline