Juma Rasululloh sollallohu alayhi vasallamga nozil qilindi. Uni Jabroil alayhissalom olib tushdilar. Oʻshanda Jabroil alayhissalomning qoʻllarida oʻrtasida qora nuqtasi bor oppoq oyna bor edi. Paygʻambar sollallohu alayhi vasallam: «Ey Jabroil, bu nima?» – deb soʻradilar. Jabroil alayhissalom: «Bu juma, Alloh taolo buni sizga va sizdan keyingi ummatlaringizga bayram qilib tushirdi. Unda siz va ummatlaringiz uchun yaxshiliklar bor. Siz hafta kunlarining avvalgi kunini bayram qilasiz. Yahudiylar va nasroniylar esa sizdan keyin bayram qilishadi. Unda duolar ijobat boʻladigan bir vaqt bor. Banda oʻsha vaqtda duo qilib, Robbidan nima yaxshilik soʻrasa, oʻsha yaxshilik uning nasibasida bor boʻlsa, Alloh taolo u yaxshilikni beradi. Qanday yomonlikdan panoh soʻrasa, Alloh taolo u yomonlikni va undan kattarogʻini ham undan qaytaradi. Bizlar juma kunini «yavmul mazid» (savoblari bisyor beriladigan kun) deb ataymiz», – deb javob berdi.