Менимча, энди оқни – оқ, қорани эса қора деб атайдиган даврлар келди. Муҳаммад Шайбонийхон сингари улуғларимизнинг пок номларини хору хаслардан тозалаб, халққа бошқатдан тақдим этиш лозим деб ўйлайман. Токим келгуси насллар ўз аждодларини яхши таниб олсинлар, шундагина уларда миллий ғурур туйғуси тўлақонли шаклланади. Энди эса юқорида эслаганим - 1998 йилда битилган ўша шеър билан мулоҳазаларимизга нуқта қўямиз:
ШАЙБОНИЙХОН
(Ўзбекистон Республикаси санъат арбоби, беназир актёр ҳожи Муҳаммад Рафиқов хотирасига)

Не кунлар кўрмади жафокаш бу юрт
Манқуртлик ёйилди, мисоли бало,
Сиз ҳам кўп кутдингиз, кўзлар бўлиб тўрт
Бизни маъзур тутинг энди, хон бобо.

Сизга тошлар отдик билиб-билмайин
Хатойимиз идрок қилиб-қилмайин,
Гумроҳлар улуғни кўзга илмайин...
Бизни маъзур тутинг энди, хон бобо.

Сиз хонсиз, ҳукмдор деса, дегулик
Асл мақсадингиз эди эзгулик,
Ғариб бошингизда бунча кўргулик
Бизни маъзур тутинг энди, хон бобо.

Дашти Қипчоқлардан келган ўзбексиз
Ойлаб от устида елган ўзбексиз,
Ҳатто Қуръон тафсир қилган ўзбексиз
Бизни маъзур тутинг энди, хон бобо.

Бобуршоҳ бир ёнда, сиз бир томонда
Кимлар шаҳид кетди, кимлар омонда,
Кўп қонлар тўкилди кўҳна Туронда
Бизни маъзур тутинг энди, хон бобо.

Халифайи Раҳмон, Имоми замон
Сиз нозиктаъб шоир, сиз – Шайбонийхон,
Қайда қолди сиздан мерос ул девон
Бизни маъзур тутинг энди, хон бобо.

Хомталаш бўлади, бирлашмаса турк
Жону жигар бўлиб сирлашмаса турк,
Бир тепа, бир тоғдай қирлашмаса турк
Бизни маъзур тутинг энди, хон бобо.

Ўзбек бағрин очар бугун дунёга
Шеърдан кўприк ташлаб Амударёга,
“Иним!” деб қўл чўзинг Бобур Мирзога
Бизни маъзур тутинг энди, жон бобо.

Абдунаби Ҳамро