DOʻSTIM, BIR GAP BOʻLARDA.

Omad yoʻqlab kelarda,
Baxtimiz ham kularda,
Siqilmagin endi hech,
Doʻstim, bir gap boʻlarda.

Qay biriga kuya san,
Qay birini suya san,
Buncha qovoq uyasan,
Doʻstim, bir gap boʻlarda.

Bugun boʻlmasa, boʻlmas,
Erta kelmasa, kelmas,
Birov bilmasa bilmas,
Doʻstim, bir gap boʻlarda.

Jonimga aylab jabr,
Koʻnglimda yoʻqdir kibr,
Shuncha qildik-ku sabr,
Endi, bir gap boʻlarda.

Tashvishlar bitar bir kun,
Azoblar ketar bir kun,
Hammasi oʻtar bir kun,
Doʻstim, bir gap boʻlarda.

Dard kelsa kulib quygin,
Darmon koʻp bilib quygin,
“Xudoga” solib quygin,
Doʻstim, bir gap boʻlarda.

Oshingni halol osha,
Qaddingni kerma shosha,
Rizqingni terib yasha,
Doʻstim, bir gap boʻlarda.

✍️ Hamdam ALLAYOR.

@hamdamallayor