Futbol | Little things

Braziliyalik futbolchilar fleshmob qilishyaptimi?

Erling Holandning samimiyligi juda taʼsirlantiradi.

Holandning men koʻrgan intervyularida u har doim oddiy gapiradi, oʻzini juda tabiiy tutadi, oʻzidan kimlarnidir yasab olmaydi.

UEFA dan mavsumning eng yaxshi oʻyinchisi mukofotini qoʻlga kiritgsn vaqtida u 22 yoshda trebl olish ertakda yashashdek gap dedi. Bu mavsum APLning birinchi turida birinchi boʻlim oxirida Pep unga jonli efirda baland ovozda tanbeh bergani juda koʻp muhokama qilindi, vaholanki u oʻsha vaqtda dublni rasmiylashtirib boʻlgan edi. Muxbirlar bu haqida undan soʻrashganda u shunday javob qaytardi: "Toʻgʻrisini aytsam, baʼzida Pepning menga baqirib tanbeh berishi yoqadi. Otam bilan ham baʼzida tortishib qolamiz va nohaq paytim otam ham menga tez-tez baqirib turadi. Pepning baqirishi ham shu kabi narsa-da axir. Men buni toʻgʻri qabul qilaman." Bu intervyu ham UEFA taqdirlash marosimida boʻlgan edi va gigant bolaning samimiy tabassum bilan bergan bu javobi butun zalni kulishga majbur qilgan edi.

Men hech qaysi futbolchi oʻzini shu kabi bolalarcha samimiylik koʻrsatganini eslay olmayman. Va bu noodatiy: axir Krishtianu oʻzini qanday tutadi, oʻzini oltin toʻp olishga loyiq deb 3 yildan beri aytib kelayotgan Mbappening dimogʻdorligini esa umuman aytmasa ham boʻladi.

Futbolda bu darajadagi super yulduzning bu darajadagi samimiylik koʻrsatishi albatta ajoyib. Umid qilamanki, u kabi futbolchilar safi kengayadi.