Men istaganimdek o‘qisam, istaganimdek inson bo‘lsam, kimningdir tinchini buzib qo‘yarkanman. Garchi bu hayot meniki bo‘lsa ham, o‘zimning yo‘limni tanlashga haqqim yo‘q. Chunki odamlar ko‘pincha o‘z hayotlarini emas, meniki kabi boshqalarning hayotini boshqarishni yaxshi ko‘radi.
Ba’zi odamlar o‘z haqiqatini yagona deb biladi va boshqalar ham shunga bo‘ysunishini istaydi.

Men istaganimdek yashay olmayman, chunki qanday yashashni bilmayman. Chunki men yashashni emas, boshqalarning ko‘nglini olishni o‘rganib kelganman. Menga bolaligimdan “odamlar nima deydi?” degan og‘ir yuk ortilgan.

Lekin baribir yashayman. O‘zim istagancha yashayman. Chunki bu hayotning har bir oniga faqat o‘zim javobgarman. Meni boshqalarning fikri emas, o‘zimning yuragim yetaklaydi.