Юнусобод 13-даҳа аҳолиси бонг урмоқда: бу ерда қабристонга тақаб аҳоли учун тураржойлар қурилмоқда. Бир неча йилдан бери давом этиб келаётган бу вандалликка ҳокимият ҳам, кадастр ҳам кўз юмган кўринади.

Юқоридаги видеодан кўриниб турибдики, қабристоннинг этагидаги, шундоқ қабрларга деярли ёпиштириб (масофа 10 метр ҳам чиқмайди) девор билан ўраб олинган ҳудудда кўпқаватли уйлар қурилмоқда. Қонунчилик талабларига тупуриб.

Ҳукумат қарорига кўра:

"Ёпиқ қабристонларнинг ва куйдиришдан кейин дафн этиладиган қабристонларнинг санитария ҳимоя зоналари (СҲЗ) 100 метрни ташкил этиши керак. Ёпиқ қабристонлар учун қабристон билан аҳоли пункти ўртасидаги СҲЗ, баъзи ҳолларда, санитария-эпидемиология хизмати органлари билан келишган ҳолда 50 метргача камайтирилиши мумкин. Турар жой ва жамоат бинолари ҳамда дам олиш зоналари деворидан қабристонгача масофа 100 метрдан кам бўлмаслиги керак"

Қайси ақли расо одам бу ҳудудни уй қуриш учун берган ва қайси ақли жойида одам бу уйни қуряптию эртага ким уни сотиб олади? Сотиб олгач, қандай яшайди, тўй қилади, болаларини кўчага ўйнагани чиқаради ва ҳоказо. Умуман, инсоний қадриятлар ва соғлом ақл қани? "Ёввойи капитализм" ҳужумига дош беролмай қаёққа чекинди улар?

Тошкент шаҳар ҳокимлиги, Юнусобод туман ҳокимлиги, Кадастр қўмитаси ва бошқа масъуллар, муаммога жавоб ва ечим кутяпти аҳоли. Бир кунда пайдо бўлиб қолмаган муаммога!

@shahnozxon