Наврўзбек Юсупов

Deputatlarning e’tiroziga nima sabab bo‘ldi?

Oliy Majlis Qonunchilik palatasidagi O‘zbekiston Ekologik partiyasi fraksiyasi hamda Ekologiya va atrof-muhitni muhofaza qilish masalalari qo‘mitasining kengaytirilgan yig‘ilishi bo‘lib o‘tdi.

Unda Ekologiya, atrof-muhitni muhofaza qilish va iqlim o‘zgarishi vazirligining “2024-yil uchun Davlat budjet mablag‘laridan foydalanish bilan bog‘liq maqsadli indikatorlari ijrosi to‘g‘risida”gi axboroti eshitildi.

Ta’kidlanganidek, har yilgi Davlat budjetining maqsadli sarflanishi bo‘yicha ekologiya va atrof-muhitni muhofaza qilish sohasida ham tizimli ishlar amalga oshirilmoqda. Xususan, o‘tgan yili cho‘l, tog‘li va tog‘oldi hududlarda cho‘llanish va qum ko‘chishi, tuproqning suv va shamol eroziyasining oldini olish hamda ekologik muhitni yaxshilash maqsadida 1 ming 887 gektar himoya o‘rmonlari (ihota) barpo etildi.

Shuningdek, “Yashil makon” umummilliy loyihasi doirasidagi tadbirlarni amalga oshirish uchun 100 mlrd. so‘m mablag‘ ajratilgan. Ushbu mablag‘larning 52 mlrd. so‘mi “Ochiq budjet” portali orqali “Mening bog‘im” loyihasini moliyalashtirishga, 48 mlrd. so‘mi boshqa ko‘kalamzorlashtirish tadbirlari uchun yo‘naltirilgan. Mazkur mablag‘lar hisobidan respublikaning 208 ta tumanida “Mening bog‘im” loyihasi doirasida “Yashil bog‘” va “Yashil jamoat park”lari barpo etilmoqda. Bundan tashqari 445 gektar maydonda yashil bog‘lar va ko‘kalamzorlashtirish tadbirlari amalga oshirilgan.

Muhokamalar davomida erishilgan ijobiy natijalar bilan birga, davlat budjetidan maqsadli indikatorlar uchun ajratilgan mablag‘larning to‘liq o‘zlashtirilmaganligi deputatlar e’tiroziga sabab bo‘ldi.

Shu bilan birga, deputatlar yo‘naltirilayotgan budjet mablag‘laridan maqsadli va samarali foydalangan holda, tabiatni muhofaza qilish tadbirlarining ijrosini ta’minlash va samaradorligini oshirish bo‘yicha bir qator takliflar berdilar.

Yig‘ilish yakunida kun tartibidagi masala yuzasidan tegishli qarori qabul qilindi.