“Soqiyimning o’gay qiziga”

Yorqinlik -
Bakalashkadan taralgan jilg’a.

Sochlaring uchida o’rmalar ilon.
Faust Lilitgamas, senga
Qiziqish bildirar bu on.
(Miyig'ida kular Mefisto)

Juvonboz – Zevs!
Uning nigohidan yur panaroqda.
Yasonga ishonma,
U va xotinlar o’rtasida
Farq yo’q – oltinsevarlar.
Tag’in aldab ketsa,
Qotillik qilma.

Tirnog’im ichida qora kir –
Qoshlaring rangi-yu shaklin eslatar.
Tishlaring o’rtasi – Kaspiy dengizi,
Ikki mintaqani ajratib turgan.
Kul, mening azizam,
Zotan qaytajak, Orol qumga suv!

Tarantino ko’rganida go’zal qo’llaring,
Oyoqlar haqida bo’lmasdi kadr.
Bresson kamera qadardi unga
Va qo’ling haqida olardi film –
Hujjatli.
(Pivo hidi anqir ulardan)

Sening turishing poetika,
Shu vajdan satrimda yo’q andin darak.
Bir sayyora sistemasiga yetar bir quyosh.
Tangri qoidasini buzmoqlik gunoh.

Femida ko’zlari -
seni ko’rgandan beri basir.
Fortuna sevajak seni beta’ma.
Chiroying isbotdir.

Bas!
Hech kim baxtli emas,
Ruchkang qapqog’i kabi.
Bas!
Butun svilizatsiya mo’jizalari
Olamga ko’zaynaging kabi qo’shmagan hissa.
U borki sen meni ko’rasan tiniq.
(Lekin qaramading, sen hali menga,
Nega?)

Qish imzo qo’ymoqda shahrimga
Bu kech...
Men esa ko’lmakda yuribman suzib.
Oyoqkiyimlarim – Nuh quvgan qavm.
Yarim tun,
Qorbola yasayotgan qiz,
Sening yaratig’ing
Xudodan baxtli.

Sigaret so’rading,
Kechir jonginam,
Men Nitssheparastman,
Tushunasan o’zing...
O’pkangni rashk qilgum
Va tutunlardan.
(Kamyu doim chekkan,
Lekin baribir,
Avtohalokatda jon taslim qilgan)

Yorqinlik –
Bakalashkadan taralgan jilg’a.
U o’xshar mening sevgimga.

Salmoqiddin