Paradoks

I

Yigit qizga sevgi izhor qildi,
Qiz esa yigitga:
"Siz hali yetarlicha ulg'aymagansiz,
Anglay olmagansiz,
Katta kishi qanday bo'lishin", dedi-yu,
Qo'lidagi Ekzyuperining
"Kichkina Shahzoda"sini o'qishni
davom ettirdi.
Men esa, qo'shni o'rindiqdan,
Sigaretam qoldig'ini chertib,
Miyig'ida kulgancha, turib ketdim:
"U korchalonga erga tegsa kerak,
Qo'zichoq ham chizish qo'lidan kelmas".

II

Yarim yo'lda sobiq sevgilimning
Mulohazasi yodimga tushdi:
"Bas qilsangchi ta'sirlanishni,
Balki Antuan shunchaki passiv pedofildir,
Qahramoni esa, Kichkina Shahzodani
Zo'rlay olmaganidan bo'lgandir xafa va
Qachondir uni zo'rlashga umid bog'labgina,
Osmonga tikilar, uning kulganini eshitganda esa, ...",
Shu joyida undan to'xtashini so'ragandim.
Men Xudoga ishonaman,
Shunday ekan, fantaziyalarim buzilishiga qarshiman.
Men ishongim kelgan narsaga ishonaman.

III

Ayollar realistlarni sevishmaydi,
(Oh, azizim Nitsshe, hamdardman senga).
Mo'jizaga ishonuvchilarni esa rad etishadi.

Xo'sh, senchi birodar,
Santaga haliyam yozmadingmi xat?

Salmoqiddin