Axborot-kutubxona markazi ochilishi
YANGI YIL TUHFASI
Xonqalik kitobxonlar yangi yilni yana bir quvonchli voqea bilan kutib olishdi. Tuman axborot-kutubxona markazi bugun ikki qavatli yangi taʼmirdan chiqqan binoga koʻchirildi. Barcha zarur qulayliklarga ega ushbu maskanning tantanali ravishda ochilish marosimi ham oʻtkazildi.
Tadbirda Xonqa tumani hokimi, faollar, nuroniylar ishtirok qilishdi. Marosimda tuman hokimi M.Davletov, Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi viloyat boshqarmasi boshligʻi D.Bekchanova, mehnat faxriysi F.Jumaniyozov va boshqalar soʻzga chiqib, davlatimiz rahbarining kitobxonlikni yanada rivojlantirish borasidagi saʼy-harakatlari, bugungi tub islohotlar, kitobning inson kamoloti, kelajagi, maʼnaviy va maʼrifiy taraqqiyotidagi ahamiyati hamda bu borada oldda turgan istiqbolli vazifalar haqida atroflicha gapirdilar.
Katta fondga ega 281 755 nusxadan iborat turli badiiy, tarixiy, uslubiy adabiyotlar jamlangan markaz foydalanuvchilari 14 285 nafarni tashkil etadi. Kitobxonlarga 19 nafar tajribali, sohaning mahoratli xodimlari xizmat koʻrsatishyapti.
Maʼlumki, kuni kecha davlatimiz rahbari Sh.Mirziyoyev Yangi Toshkentdagi ulkan qurilishlar majmuasini borib koʻrib, Oʻzbekiston Milliy kutubxonasi 4 qavatli, oʻz nomiga mos milliy dizaynda boʻlishini alohida taʼkidladilar:
-Men avval ham aytganimdek, bizning ikkita oʻq tomirimiz, ikkita tayanch ustunimiz bor: biri-iqtisodiyot boʻlsa, biri maʼnaviyatdir. Maʼnaviy buyuk xalq –iqtisodiy tomondan ham buyuk boʻladi. Bilimli yoshlar bobolarimizga munosib keng fikrli, milliy gʻururli, yetuk insonlar boʻladi. Shuning uchun yangi shahrimiz qurilishini maʼrifat maskanlaridan boshlayapmiz. Bular yuz yilga tatigulik maʼnaviyat, maʼrifat, ilm oʻchogʻi boʻlishi kerak, -dedi Shavkat Mirziyoyev.
Viloyatimizning barcha tumanlarida aholi, ayniqsa yoshlar oʻrtasida kitobxonlik madaniyatini yanada yuksaltirish, axborot-kutubxona faoliyatini rivojlantirish borasidagi samarali va koʻlamdor ishlar davom etadi.
🌐aokaxorazm.uz | 💬Facebook | ✅Telegram |🌐Instagram