Tuproq chorlamoqda jasadim,
Jonim hozir, ajalim xurjun.
Oʻzimga deb tobut yasadim
Tugʻyonini anglamoq uchun...
Oq surp tashlab qaro yuzimga,
Goʻyo boqdim kafan ichindan.
Goho tushunolmay oʻzimga,
Hazarlanib ketaman chindan.
Oʻlay desam, aybim beadad,
Qolay desam bezib ketganman.
Ey Allohim, oʻzing ber madad,
Bir oʻzingga umid etganman.
Yozgan kuni, minarman men ham,
Toʻrt dastali mozor ulovin.
Balki mahtal menga jahannam,
Taxt qilib qoʻygandir olovin!
Ajal kelsa nihoyam soʻylab
Ketishimni etganda ayon.
Yer qaʼrida yotishim oʻylab,
Butun vujudimda gʻalayon.
Ohlarim yemirdi boʻgʻzimni,
Baxt figʻonim quvladi koʻproq.
Sira ham toʻymagan koʻzimni,
Toʻydiradi bir uyum tuproq.
Gunoh uzra savobim quyqum,
Omonatim topshirsam birdan.
Ha, manguga choʻzilsa uyqum,
Rozi boʻling, haqir Zokirdan.
Ora-orada sheʼr ham yozib turaman. Ismim Zokirjon :)