🌙 Marhabo Ramazon!

Yaratganda Yer-u Osmonni Rahmon,
Oy ila Quyoshga manzil bichgan on,
Oylarni o‘n ikki aylagan zamon,
Seni ular ichra aylamish sulton,
Marhabo, xush kelding, xushvaqt Ramazon!

Sen o‘zing xalqlarga bo‘lding qutlug‘ oy,
Sendadir chin sevgi, haqiyqiy chiroy,
Har neki fazilat topmish sendan joy,
Sen bilan faxr etar hatto ko‘kda Oy,
Marhabo, xush kelding, xushvaqt Ramazon!

Robbim bag‘ring ichra yashirmish bir tun,
Unda xalq taqdirin bitarmish butun,
Ummat umri ajri bo‘lsin deb butun,
Aylamish bu tunni ming oydan afzun,
Marhabo, xush kelding, xushvaqt Ramazon!

Shu tuningda olmish Furqon osmonim,
Shu kechang tushmish yer uzra Qur’onim,
Jibrilu malaklar bo‘lar mehmonim,
Maqbuldir duoyim, qolmas armonim,
Marhabo, xush kelding, xushvaqt Ramazon!.

Jannat eshiklari ochilar senda,
Do‘zax eshiklari yopilar senda,
Shaytonlar zanjirband etilar senda,
Nafslar ulardan qutular senda,
Marhabo, xush kelding, xushvaqt Ramazon!.

Esingdami, Rasul seni kutardi,
Sen kelsang, ummatin tabrik etardi,
Sevinchdan goh kular, goho yig‘lardi,
Fazling deb, barchaga seni maqtardi,
Marhabo, xush kelding, xushvaqt Ramazon!

Jibril kelib senda Rasul qoshiga,
Sherik bo‘lib bashar xizmatdoshiga,
Singdirib Qur’onni ich-u toshiga,
Xatm qildirardi ul sirdoshiga,
Marhabo, xush kelding, xushvaqt Ramazon!

Gar bilsang, o‘shanda Habib Mustafo,
Saxovat bobida erdi gar yakto,
Shavqingdan sarf etib ne bor muhayyo,
Shamoldek esardi etganda saxo,
Marhabo, xush kelding, xushvaqt Ramazon!

Sen sabab qo‘l tortib ahl-u ayoldan,
Seni deb kechardi necha haloldan,
Masjidga uy tikib xurmo-yu toldan,
Fazlin so‘rar erdi U Zuljaloldan,
Marhabo, xush kelding, xushvaqt Ramazon!

Sanoqli kunlaring topib nihoya,
Hilolingga zavol solganda soya,
Nabiy mahzunligi bilmasdi g‘oya,
Der erdi iymondan buni kinoya,
Marhabo, xush kelding, xushvaqt Ramazon!

Biz esa ummatmiz, bil, o‘sha zotga,
U kabi boqarmiz biz ham hayotga,
Uning yo‘li bizni eltar najotga,
O‘rgatmish sen bilan bizni sabotga.
Marhabo, xush kelding, xushvaqt Ramazon!

U zot kabi biz ham seni sevarmiz,
Doimo bo‘yingga mushtoq turarmiz,
Qudumingdan shod-u xurram bo‘larmiz,
Firoqingdan oncha mahzun yonarmiz,
Marhabo, xush kelding, xushvaqt Ramazon!

Jo‘sh urar Rahmonning rahmati senda,
Mavj urar mag‘firat daryosi senda,
Yuvilib ummatning isyoni senda,
Do‘zaxdan qutulish imkoni senda,
Marhabo, xush kelding, xushvaqt Ramazon!

Sen bilan sog‘ erur jism-u jonimiz,
Sen bilan soflanar tanda qonimiz,
Sen bilan poklanar bu vijdonimiz,
Sen bilan nurlanar ham iymonimiz,
Marhabo, xush kelding, xushvaqt Ramazon!

Bitmagay bir umr vasfing aylasam,
Siyrating yozmoqqa ojizdir qalam,
Shavkating oldida qilib qaddim xam,
Loyiqdir ta’zim-la tun-u kun desam:
Marhabo, xush kelding, xushvaqt Ramazon!

Hasanxon Yahyo Abdulmajid