Titul varagʻini toʻldirish kabi barcha rasmiyatchiliklarni bajarib boʻlgach, diqqatni jamlashga va atrofni unutishga harakat qiling. Siz uchun faqat vazifalar matni va soatlar mavjud boʻlishi kerak. Qatʼiy belgilangan vaqt javoblar sifatiga taʼsir qilmasligi kerak. Javobni kiritishdan oldin savolni ikki marta oʻqing va sizdan nima talab qilinayotganini toʻgʻri tushunganingizga ishonch hosil qiling.

Test yechishni sizda shubha tugʻdirmaydigan savollarga javob berishdan boshlang. Uzoq oʻylantiradigan savollarga koʻp toʻxtalmang. Shunda ancha tinchlanasiz, yuklama yengillashadi. Miya yanada aniq ishlay boshlaydi. Qolgan butun kuch va diqqatni qiyin savollarga yoʻnaltirish mumkin boʻladi.

Vazifani birinchi soʻzlaridanoq uning shartini tushunaman deb shoshqaloqlik qilmang. Bunda eng oson savollarga ham xato javob berish ehtimoli oshadi. Shoshqaloqlik natijasida javobi miyangizda naqd boʻlgan savolni ham boy berishingiz mumkin.

Yangi vazifani oʻqiyotganda avvalgi hamma narsani unuting. Testlardagi vazifalar bir-biri bilan bogʻliq emas, shuning uchun siz ilgari qoʻllagan qoidalar va formulalar yangi vazifani toʻgʻri hal qilishga xalaqit beradi.

Agar bironta testga javobni bilmasangiz, bu muvaffaqiyatsizlik taʼsirida qolib ketmang. Yangi savolni yangi imkoniyat sifatida qabul qiling. Avvalgi vazifalar natijasidagi tushkunlik keyingi topshiriqlar samarasiga taʼsir koʻrsatmasin.

Toʻgʻri javobni bilmasangiz, notoʻgʻriligiga ishonchingiz komil boʻlgan javoblarni ketma-ket chiqarib tashlang. Bu variantlar oʻrtasida tanlov doirasini toraytiradi.

Bajargan topshiriqlaringizni tekshirib chiqishga vaqt ajrating, hech boʻlmaganda koʻz yugurtirib, xatolarni koʻrish uchun vaqt toping.

Aniq javobga ishonchingiz komil boʻlmasa, intuitiv ravishda biror variantni tanlang. Baʼzida intuitsiyaga ishonish kerak.