Оққўрғонда икки эркак “жин чиқариш” пайтида 42 ёшли аёлни ўлдириб қўйди

Воқеа 2023 йилнинг июл ойида содир бўлганлиги айтилмоқда.

Суд ҳукмида келтирилишича, айбланувчи 35 ва 44 ёш. Икки эркак Оққўрғон туманидаги маҳаллардан бирида яшовчи 42 ёшли аёлнинг уйига бориб, уни ичига “жин кириб қолгани”га ишонтиришган ва “жинни чиқариш” учун “дам солиб”, муолажа ўтказиш кераклигини айтишган.

Эркаклар 1 млн сўм эвазига “жинни чиқариб” беришни айтиб, ҳар куни соат 5:00 ларда аёлнинг уйига борган ва бир соат давомида гўёки “жин чиқариш” билан шуғулланишган.

“Муолажа” пайтида улар ўзлари билан олиб келган болға, темир қозиқ, темир занжир каби буюмлар билан аёлнинг кўкрак-қорин қисми, иккала қўл ва оёқ соҳаларига куч ишлатишган. Бу орқали аёлга унинг ўлимига сабабчи бўлган оғир тан жароҳати етказишган. Жароҳатлар оқибатида аёл 2023 йил 20 июл куни ўзининг яшаш хонадонида вафот этган.

Суд ҳукми билан Р.Бга 3 йил, Ю.Тга 2 йил 6 ой муддатга ОМҚ жазоси тайинланган.