USTOZ


O‘zgacha bir ishtiyoqu sehr bilan,
Ko‘ngillarni ilm bilan o‘rar ustoz,
Saodatga yetaklaydi mehr bilan,
O‘quvchisin farzandidek ko‘rar ustoz.

Xaloldir u, xalol oshin oshlab o‘tar,
Goho kulib, goho ko‘zin yoshlab o‘tar,
Tanbehi ham erkalashga o‘xshab ketar,
O‘quvchisin farzandidek ko‘rar ustoz.

Qalblarga yo‘l izlaydi u maskin bo‘lib,
Dardlariga darmon izlar taskin bo‘lib,
Kasal bo‘lsa g‘am chekadi g‘amgin bo‘lib,
O‘quvchisin farzandidek ko‘rar ustoz.

Ilm deya oqarar soch tolasi ham,
Ilm deya chiqar qalbdan nolasi ham,
Esdan chiqar goho tuqqan bolasi ham,
O‘quvchisin farzandidek ko‘rar ustoz.

Kamolotga yetsa uning ko‘ngli to‘qdir,
O‘gitlari saodatga eltar o‘qdir,
Unga bundan bahtiyorroq umr yo‘qdir,
O‘quvchisin farzandidek ko‘rar ustoz.

✍Xurshid Karim