Хайрулла Ҳамидовдан

– Сахийликни кимдан ўргандинг, – деб сўрадилар Хотам Тойидан.
– Ғиштдан ўргандим, – дея жавоб қилди.
– Хеч замонда ғиштдан ҳам бир нарса ўрганиб бўларканми?
– Одамларнинг қатор туриб бир-бирига ғишт узатганларини кўрганмисиз? Бир гал мен шундай ҳашарда қатнашдим. Ажиб бир ҳолдан ўзим учун хулоса чиқардим: қачонки қўлимдаги ғиштни узатсамгина менга ғишт узатишди. Узатмай, қўлда тутиб турсам, ғишт келиши ҳам тўхтади.
Ҳаёл қилдим дейди Хотам тойи: Демак, мол-дунё ҳам шундай. Инфоқ-эҳсон чиқариб турсанг, бирингга ўн келади, бахиллик қилсанг, боридан ҳам барака кетади.

@xayrulla_xamidov1

Бир намозни канда қилмайдиган тақводор бола сунъий жонлантириш бўлимида жон бераётган эди.
Докторлардан бири боланинг боши устида энгашиб, секин деди:
- Укажон, калима келтир, жаннатга тушасан!

Бола бошини қимирлатиб қўйди, аммо калимани айтмади.
Доктор энди қаттиқроқ, танбеҳ охангида қайтарди:
- Ука, калима келтир, дедим! Кимнинг охирги сўзлари “Ла илаха иллаллох”
бўлса, унга дўзах ҳаром бўлади, калимани айт!

Кўзлари юмилиб бораётган бола яна бошини қимирлатди, аммо яна бирор сўз айтмади. Шунда доктор унга ялингандек, ёлворгандек мурожаат қилди:
- Жон, ука, дўзахи бўлиб қолма, “Ла илаха иллаллоҳ” дегин!

Бола бор кучини йиғиб, калимани айтди:
- Ла илаха иллаллоҳу Муҳаммадур росулуллоҳ!

Шундан сўнг бола оҳиста жон берди.

Бу гапни эшитган боланинг онаси фарёд уриб йиғлади. Доктор боланинг онасидан сўради:
- Нима учун болангиз икки марта сўраганимда калима келтирмади?

Боланинг онаси кўз ёшларини артиб, жавоб берди:
- Чунки болам соқов эди...

@xayrulla_xamidov1

Тонг кирди, ҳаётни уйғониб яша,
Сўзларинг жарангдор, сўз қониб яша.
Донолар суҳбатин тингла сукут-ла,
Нодонга жавобни қизғониб яша!

©️Х. Хамидов
@xayrulla_xamidov1

Жума…
Бир куни уйғониб, ишқалаб кўзни,
Ғарбда эди қуёш, не бу, не ҳолат
Наҳотки тугади кўкда ҳам тартиб?
Наҳотки охири енгди разолат?

Йўқ, бу охир эмас, англадик ўзни
Азал вазифасин қилди табиат.
Инсоният бир сафда кутар у сўзни...
Аслида бошланди бугун Адолат!

@xayrulla_xamidov1

ХАЙРУЛЛА ҲАМИДОВГА

Ҳам спортда, ҳам шеъриятда,
Мухлислари юрар ҳайратда.
Мазмун излаб яшар ҳаётда —
Фахримиздир Хайрулла Ҳамид.

Мисралардан дур ёғилар, дур,
Улкан фикр, улкан тафаккур.
Минглаб мухлис айтар: “Ташаккур!”
Фахримиздир Хайрулла Ҳамид.

Динни севиб, динни қадрлар,
Илҳомидан ёнар сатрлар.
Мисралардан излар сабрлар —
Фахримиздир Хайрулла Ҳамид.

Футболда ҳам ақли — мисли ўқ,
Юрагида чўғ ёнади, чўғ.
Унга етар зўр шарҳловчи йўқ —
Фахримиздир Хайрулла Ҳамид.

Туҳматларда баъзан озди у,
Дардин қоғозларга ёзди у.
Ингна билан қудуқ қазди у —
Фахримиздир Хайрулла Ҳамид.

Топаверсин халқ ичра эъзоз,
Қилаверсин қалбларга парвоз.
Омон бўлсин, бор бўлсин устоз —
Фахримиздир Хайрулла Ҳамид.

©️Мактуба Шайдо

@xayrulla_xamidov1

Пайғамбаримиз Муҳаммад (с.а.в.) қабристонга борганларида:

- Ассалому алайкум, эй аҳли қабр, сизлар бизнинг ўтганларимизсиз ва биз ҳам яқинда орангизга қўшиламиз, - дер эдилар.

Жума муборак!

@xayrulla_xamidov1

Фотима онамиз вафотларидан сўнг хазрати Али:

“Қачон ташвишлансам, унинг юзига қарардим ва барча ташвишларим йўқоларди. Бу юзларни қандай қилиб ер билан ёпишим мумкин...?”

@xayrulla_xamidov1

Толе вужудимни чирмашиб қучса,
Бахтдан сармаст бўлиб кетсам бағоят,
Юрагим ҳапқирса, тинмасдан учса,
Заминга қайтарар, биргина оят...

Қалбим ўраб олса сувсиз булутлар,
Юпанч ҳам қолмаса биров айтгувчи,
Ҳаётга қайтарар биргина оят:
Мен Аллоҳникиман, Унга қайтгувчи!

Жума муборак!

@xayrulla_xamidov1

Гўё эслатармиш мазасин болни -
Мажнун изҳорида сохта нотиқлик.
Тинмай мақташади васфин висолни,
Мен эса қочаман, қўрқоқ ошиқлик...

Қўрқаман васлидан, бўлмайин деб хор,
Илтимос қиш ўтсин, ўтсин яна ёз,
Севгилим, Аллоҳим, кечиксин дийдор,
Ҳозир гуноҳим кўп, савобим ҳам оз.

©️Қахрамон Асланов

@xayrulla_xamidov1

Аллоҳга итоат қилиб турганингда, У сени (неъматлардан) маҳрум қилиши хавфли эмас. Аммо осийлик қилиб турганингда ҳам, неъмат беравериши хатарлидир.

@xayrulla_xamidov1

Берилган неъмати учун кимгадир ҳасад қилинмайди. Аллоҳ ундан бунинг учун нималарни олганини билмаймиз.
Худди шунингдек, бошга тушган ташвишдан ўксинилмайди. Аллоҳ ўрнига нималар беришини ҳали билмаймиз.

@xayrulla_xamidov1

ҲИМОЯЧИ

Абдуқодир Ҳусановга

Бу қандай шарафли, шонли ҳикоя,
Ким «Қалъа» дер уни, яна ким: «Қоя».
Рақиблар йўлини тўсган бу ўғлон
Ўзбек шаънини ҳам қилар ҳимоя!

2025
©️Нодир Жонузоқ

@xayrulla_xamidov1

Ўзбеклар нима дейди?

Дин ҳақида: - Одамнинг манетида бўлсин (кўкрагига уриб), вей!

Бойлар ҳақида: - Мард киши. Эҳсони катта саховатли одам. Ҳожи. Бир тўй қилди ўтган йили, тўкиб ташлади, келганам келди, келмаганам келди.

Уччига чиққан таниш-билишчи ва порахўр ҳақида: - Ҳожатбарор одам. Ҳозирги замонда танишсиз иш битиролмайсан. Бир суҳбатини ол, керак бўлиб қолади.

Ёғли овқат ҳақида: - Дўхтирлар ваҳимачи халқ бўлади. Катта-катта олавер.

Ичкилик ҳақида: - Ўзимас, кайфи ҳаром. Икки ака-ука бўлган экан (давомини биласиз).

СССР ҳақида: - (орзумандлик билан) Бошқача даврлар эди. Гугурт икки тийин. Бир сўмга, эҳҳе..

Мустақиллик ҳақида: - Ҳозир ҳам кам бўлганимиз йўқ. Ишлаган қандини уриб яшаяпти.

Америка ҳақида: - Иплос давлат. Ҳамма уруш ўшағдан чиқади.

Тошкент ҳақида: - Свет ўчмайди, газ бир метр.

Тўйлар ҳақида: - Ярашиғи шунақа. Маҳалла-кўйдан кам ё ортиқ жойимиз йўқ.

Газеталар ҳақида: - Афандиси, сканворди боридан олиб тураман.

Китоб ҳақида: - Ўқиб шаҳар оберармиди. Кўряпмиз ўқиганларни.

Қиз фарзанд ҳақида: - Ўқиб шаҳар оберармиди. Кўряпмиз ўқиганларни.

Интернет ҳақида: - Ҳозирги болаларнинг ҳаммасининг интернетда сайти бор.

Масжид ҳақида: - Пенсияга чиқиб олай, Худо хоҳласа, намозни канда қилмайман.

Сиёсат ҳақида: - Кетни қисган бой бўлади. Сиёсатга аралашма. Ундан кўра уят-уят гаплардан гаплашайлик.

Президент ҳақида: - Ўзи яхши одам, атрофидагилар ярамас.

(с) Шукуржон Исломов 2019-йил.

@xayrulla_xamidov1

Банди бургут тeмир кишанни ғажир,
Ҳар томон сачрайди майда тошчалар.
Узилай-узилай дeб қолди занжир...
Самони бўшатинг,майда қушчалар.

✍Хайрулла Ҳамидов

@xayrulla_xamidov1