Баъзи раҳбарларга...

Сиз ҳақсиз, Сиз доно, Сиз даҳодирсиз,
Ҳурматингиз чексиз - бебаҳодирсиз.
Эртакда уч бошли аждарни енгган
Бамисли паҳлавон бир баҳодирсиз!

Сизнинг айтганингиз бизларга вожиб,
Не деманг, қилармиз кўксимиз очиб.
Юмшоқ жойимизга яхшилаб тепинг,
Қайга ҳам борардик, бу ердан қочиб.

Ҳар қандай қонундан устун сўзингиз,
Баданларни тешар қаҳр кўзингиз.
Отангиздан мерос қолгандек яшанг,
Бу бино, идора, юмшоқ курсингиз!

Катта раҳбарларнинг дилини топинг,
Ҳар қандай муаммо йўлини топинг.
Сизга қарши ҳеч ким гапиролмасин,
Ҳақ сўзни айтганнинг тилини чопинг!

Ахир, раҳбарликнинг ўзи бўлмайди,
Бир-икки сўкишдан ҳеч ким ўлмайди.
Фиръавн, Гитлердек бешавқат бўлинг,
Йўқса, омадингиз сира кулмайди.

Ногаҳон қоқилиб кетсангиз, тойиб,
Сиздан сўнг ходимлар ичади тўйиб.
Ахир, Сиздайларнинг борлиги мотам,
Байрамдир ногаҳон бўлгани ғойиб.

Шунинг-чун, бағри кенг олам бўлингиз,
Халқимнинг дардига малҳам бўлингиз.
Танқидни борича қабул қилгувчи,
Юртбоши айтгандек одам бўлингиз!!!

© Вафо Мўмин

✅ Telegram | 🌐 Instagram | 📹 Youtube