Minoy sivilizatsiyasi san'ati namunalari qatoriga bezakli kulolchilik buyumlari, muhrlar, kishik haykalchalar va rangin freskalarni keltirish mumkin. Tadqiqotchilar fikricha, Minoy sivilizatsiyasi vakillari asl freskani ixtiro qilishgan bo'lib, bunda devorga surilgan bo'yoq devorning bir qismiga aylanishiga erishiladi. San'at asarlarlarida tanlangan odatiy mavzular tabiat va turli marosimlardir. Minoy san'ati fantastik, yoki ekstatik sifatga ega bo'lib, asarlarda obrazlar harakatda aks ettirilgan.

Minoy sivilizatsiyasining ijtimoiy tabaqalanishi haqida bizga juda oz ma'lumotlar ma'lum. Dafn marosimlari va xonaki arxitektura ijtimoiy tabaqalanish mavjudligidan dalolat beradi, lekin Minoy tasviriy san'atida hech qanday shubhasiz hukmdor tasvirini uchratmaymiz. Lekin Qadimgi Misr solnomalarida Minoyliklarning muayyan davlat boshqaruv tizimiga ega ekanliklari keltiriladi. Xuddi shu yo'sinda, ba'zi manzilgohlar siyosiy va iqtisodiy jihatdan bir-biri bilan bog'liq tuyilsada, birlashgan Minoy davlati, yoki davlatlari mavjud bo'lgani ham aniq emas. Diniy amaliyotlar sifatida tepaliklardagi ibodat manzilgohlari va muqaddas g'orlarda sigʻinish amaliyotini keltirish mumkin, biroq Minoyliklar Panteoni yoki xudolari haqida aniq ma'lumotlar mavjud emas.

Minoyliklar Egey dengizi va Sharqiy Oʻrta yer dengizi bo'ylab keng ko'lamli savdo aloqalarini olib borishgan. Ular odatda qishloq xo'jalik mahsulotlari va qimmatbaho hunarmandchilik buyumlarini eksport qilib, evaziga orolda topilmaydigan metallarni import qilishgan. Savdogarlar va hunarmandlar orqali Minoy madaniyati Krit sarhadlaridan o'tib, Kikladlar, Kipr, Misr, Italiya, Anatoliya va Levantgacha yetgan. Minoylik san'atkorlar huroj davlatlari hukmdorlari tomonidan yollangan bo'lib, bunga misol sifatida Misrdagi Avaris freskalarining Minoylik usta-san'atkorlar tomonidan ishlanishini keltirish mumkin