Majburiy ta'limUlug' ta'lim maskani maktab,
Biz ham uning kichik a'zosi.
Kimlar uchun balki murakkab,
O'n bir yillik qamoq jazosi.
Qo'lda kishan o'rniga kitob,
Ham siyohi tugamas ruchka.
Qonunlarning soni behisob,-
Bittasi ham kirmagan kuchga.
Chizmachilik, tarix, fizika...
Hammasidan ustun davomat.
Eng yoqtirgan o'quvchisiga
Ustoz doim qilar saxovat.
Zamonaviy, yangicha ta'lim,
Hamma yerda yangraydi e'lon:
"Televizor bermoqda bilim,
Endi olib kelmang telefon!"
Bu ham asli oddiy kinoya,
Tekshiruvda bugun har qadam.
Dars qoldirish endi jinoyat,
Hatto kasal bo'lib qolsa ham.
Bu majburiy ta'lim buyrug'i,
Har kun forma kiyib kelish shart.
Uning asl majburiyligi-
Ustozlarni hurmat qilish shart!
Majburiydir har kun ertalab,
Tong sahardan madhiya kuylash.
Bayramlarda soatlar sanab,
Uyga ketish haqida o'ylash.
Majburiydir hatto dars qilish,
Bu go'yoki yechilmas tugun.
Faqat biron ishga pul yig'ish,
Ixtiyoriy-majburiy bugun.
Balki aytar: "Qo'rqmading nechun?"
Qarsak chalib o'tiruvchilar.
Ta'zim qilar bugun siz uchun,
Asabni yeb bitiruvchilar!
✍Shohrux Erkinov
2024-yil
