Umrini oshiq hamisha
O'tkazur orzu bilan
Oyning o'n beshi qorong'u
O'n beshi yog'du bilan

Sevgida ko'ksingga tomgan
Ko'z yoshingdan foyda yo'q
Ishq axir shunday olovki
O'chmagay u suv bilan

Zahmati ishq dard erursa
Zahmati she'rdur davo
Chunki, og'uning shifosi
Deydilar, og'u bilan

Barcha zahmat menga bo'lsin
Mayli, doim men yashay
Bu ajib totli azobu
Bu shirin qayg'u bilan

Yoshligim umrim nahori
Ishqu she‘rsiz ne hayot
Tongni yolg‘iz g‘aflat ahli
O‘tkazur uyqu bilan

Yorni men jonim deb aytsam
Iltifot deb o‘ylamang
U yashar mensiz va lekin
Men tirikman u bilan

Erkin Vohidov