​​Ey yigit, taqdir mezoni ostida, sabrni yostiq, rozilikni libos qilib, ibodat qilgan holingda xursandchilikni kut. Agar shunday qilsang, taqdiring izmida bo‘lgan Zot fazl va karami ila seni mukofotlaydi. Ey jamoa, taqdirga rozi bo‘linglar va unga muvofiq bo‘lishda Abdulqodir mujtahidga yuzlaninglar. Qadarga rozi bo‘lish Qodir zotning huzuriga olib boradi.

Ey jamoa, Alloh azza va jallaning qudrati va fe’llariga taslim bo‘laylik. Zohir va botinda Uning taqdiriga rozi bo‘lib, boshimizni egaylik.

Ey yigit, shariat chegaralari ustida taqvo qil, nafs, havo, shayton va yomonliklarga nisbatan xilof yo‘l tut. Mo‘min kishi bularga qarshi kurashuvchi bo‘ladi.

Albatta, Rabbilarining qudrati va fe’li ularni so‘zlatadi. Bu dunyoda tillarini harakatlantirib qo‘ygani kabi ertaga qiyomat kunida a’zolarni ham gapirtiradi. Har bir gapiruvchini so‘zlatgan Alloh azza va jalla a’zolarni ham gapirtiradi, ularda nutq sabablarini paydo qiladi. Agar Parvardigor bandalar uchun biror ishni iroda qilsa, avvalo ularni bu ishga tayyorlaydi. Xalqlarning ustida hujjat sodir bo‘lsin uchun xushxabar va ogohliklarni yetkazdi, payg‘ambar va elchilar yubordi.

Muhiddin Abu Muhammad Abdulqodir Jiyloniy (Gʻavsul A’zam) hazratlarining "Rabboniylikni anglash" kitobidan