#kengash

Universitet Ilmiy kengashining 7-sonli yig’ilishida muhim qarorlar qabul qilindi

Navoiy davlat universitetida Ilmiy kengash yig’ilishi o‘tkazildi. Yig’ilishni Kengash raisi — universitet rektori, professor Muxiddin Kalonov olib bordi.

Kengash avvalida universitet Ijro intizomi va monitoring bo‘limi boshlig’i Allayeva Lola Uvaytovnaga Oliy ta’lim, fan va innovatsiyalar vazirligining sertifikati topshirildi. Shuningdek, bir necha yillik samarali mehnati, yuksak sadoqati hamda Yangi O‘zbekistonning istiqbolli farzandlarini ma’naviy yetuk qilib tarbiyalashda qo‘shayotgan hissasi uchun oliygoh xodimi Berdimuratov Tursun Yerejepbayevich universitet rektori tomonidan Faxriy yorliq bilan e’tirof etildi.

Taqdirlashlardan so‘ng, Kengash yig’ilishidan o‘rin olgan masalalar muhokama qilindi.

Kun tartibida “Edo.ijro.uz” ijro intizomi idoralararo elektron tizimi orqali kelgan xatlar ijrosi, xalqaro reytingdan joy olish maqsadida olib borilayotgan ishlar hamda joriy 2024/2025-o‘quv yili uchun qabul natijalari ko‘rib chiqilib, mas’ullar tomonidan hisobot berildi.

Shuningdek, bir nechta turli masalalarda mutaxassislarning tahliliy ma’lumotlari tinglandi. Xususan, doktorlik dissertatsiyasi mavzusini tasdiqlash va ilmiy rahbar tayinlash, darslik, o‘quv qo‘llanma, monografiya, risola va o‘quv adabiyotlarini nashrga tavsiya etish, raqamlashtirish bo‘yicha amalga oshirilgan ishlar, rahbar va pedagog kadrlarning attestatsiya natijalari, doktorantlarning yakka tartibdagi rejalarini hamda ilmiy rahbar doktorant uchun ixtisoslik bo‘yicha 2025-yil uchun nazariy-metodologik dasturlarni tasdiqlash, Ilmiy-texnik kengash Nizomi hamda tarkibini tasdiqlash, professor-o‘qituvchilarga dissertatsiya ishlarini yakunlashlari va himoya qilishlari uchun ijodiy ta’til berish, “Odob-axloq kodeksi”ni tasdiqlash va boshqa masalalar ko‘rib chiqilib, tegishli qarorlar qabul qilindi.
Yig’ilish yakunida esa faxriy pedagog-ustoz Xolmurodov Abduhamid Oripovichga tavalludi munosabati bilan esdalik sovg’alari taqdim etildi.