MENI SHE'R YOZISHGA MAJBUR QILGANLAR...

Ming rahmat sizlarga berdingiz saboq,
Jilmayib ortimdan pichoq urganlar.
Sizlarni hech qachon unutmayman yo'q,
Meni she'r yozishga majbur qilganlar...

Chamamda, yer usti shunchalar kuchli,
Yuribdi besabab bag'rim tilganlar.
Attang, bu odamlar emas bir yuzli,
Meni she'r yozishga majbur qilganlar.

Hayronman, sizlarni nima deb atay,
Boshimga g'am kelsa obdon kulganlar.
Qoshimga kelasiz qaytadan qanday?
Meni she'r yozishga majbur qilganlar.

Qalbimni qabriston ayladim sizga,
O'zlari tirig-u ,dilda o'lganlar.
Siz sabab bahorim aylandi kuzga,
Meni she'r yozishga majbur qilganlar.

Sizlarga ishimiz tushmasin illo,
Bizning g'alabamiz motam bilganlar.
Telbaning ishini o'nglaydi Xudo,
Meni she'r yozishga majbur qilganlar...

Malika Yoqubzoda