* * *

Koshki bilmasaydim sening borliging,
Koshki begonalar bo‘lsaydik mutloq.
Ammo, o‘rtayverar bevafoliging,
Jondek azizliging qiynaydi biroq!

Koshki topolmagan bo‘lsayding izlab,
Koshki xotiramdan ketsayding o‘chib.
Shunday bo‘lishini bilsaydim...
Yig‘lab,
Sening sayyorangdan ketardim ko‘chib.

O‘sha kun davonda yopilsaydi yo‘l,
Lola sotuvchiga tushmay nigohing.
Yomg‘ir yog‘ib qolsa, yog‘samidi do‘l,
Lashkar tortmasaydi qalbga sipohing!

O‘sha kun tomog‘ing bo‘lsayu hasta,
Ovozing eshitib bo‘lmasaydim lol.
Endi nima qilsang, qilginu, asta,
O‘zingni qalbimdan o‘chirtirib ol!

Qaniydi, sen erta kelib dunyoga,
Meni so‘ramasa edi Xudodan onam.
Qaniydi, mendek shu baxtiqaroga,
Sen hali tug‘ilmay tutilsa motam.

Endi kech...
Foydasiz...
Bo‘lar ish bo‘ldi,
Ishonsang, Allohga ko‘rdim yalinib.
Chashmi-javlonimdan bir daryo to‘ldi,
Va men qarmog‘inga qoldim ilinib.

Biron bir rejamda yo‘q edi bu ish,
Boshim balolarga yo‘q edi istak.
Sog‘inib yashashdek eng og‘ir yumush,
Bundan ortiqroq baxt bo‘lmasa kerak!