#Oʻqituvchi_fikri
Surxondaryolik oʻqituvchi Dildor Nurmuhamedovaning Facebook ijtimoiy tarmogʻidagi oʻz sahifasida pedagoglar attestatsiyasi haqida bildirgan fikrlarini eʼtiboringizga havola qilmoqdamiz:
“Oʻqituvchilar attestatsiyasi haqida deyarli har kuni guruhlardan guruhlarga sakrab oʻtadigan negativ yondashuvli munosabatlarga duch kelyapmiz. Albatta, har kim oʻz qarashiga, oʻz fikriga, oʻz soʻziga ega va aytishga haqli.. Ammo, tanganing ikkinchi tomoni borligi hisobga olinmagan ayrim qarashlar ijtimoiy tarmoqda shu qadar u yoqdan bu yoqqa urilayotgan uchar “qush” boʻlyaptiki, atrofdagilarni ham taʼsir doirasiga tortmay qoʻymayapti. Natijasi esa maʼlum. Qoʻnim yoʻq... Toʻxtam yoʻq... Qaror yoʻq...
Azizlar, attestatsiya, ayniqsa, pedagoglar uchun judayam zarur. To pedagogik faoliyatimiz yakunlangunga qadar har kuni, har soat oʻqib izlanishimiz shart. Axir, buni bila turib shu kasbni tanladik. Xalq savodi, madaniyati, maʼnaviyati, turmush tarzi Siz bilan bogʻliq ekan, ulardan, eng birinchi navbatda, bilimda ustun boʻlish talab etiladi. Attestatsiya esa, tan olgimiz kelmay tursa-da, bizni izlanishga undaydi, bilimimizni charxlaydi (moddiy oʻsishga erishilishi yana bir mavzu). Aytgancha, bu yilgi baholash mezoni ham oʻzgargan-ku, 20 ball maktabniki(maktabning qoʻyib berayotgan bali ham alohida mavzu!).
“Maktabga borsak ham kitob, test; uyga kelsak ham kitob, test; qozon boshida ham; ovqatlanishda ham, xullas, attestatsiyaga tayyorlanish birinchi darajali boʻldi, qolgani qolib ketdi” – deya norozilik nafasi ufurib turgan suhbatlarni oʻqiysiz. Hoy, baraka topgur, aynan sinovga yaqin oylarda vaqtni tigʻiz qilib tayyorlanishga sabab nimada? Undan oldin, yaʼni bosh devorga taq etguncha eshikni topish yoʻllari izlanmaydimi, aslida. Faqat zarurat boʻlgandagina qoʻshimcha darslik, metodika, kitoblar oʻqiymizmi(“titamizmi?”).
“Falonchi ustoz attestatsiyadan oʻta olmagani uchun qon bosimi oshib ketibdi”, “Attestatsiyada oʻta olmadi, endi maktabda shogirdlariga nima deydi”, degan suhbatlar bor. Attestatsiyadan oʻta olmaslik hech qanday fojia emas-ku, yanada oʻz ustimizda ishlashga chaqiruv, xolos. Bunda hissiyotga berilish: asabbuzarlik, siqilish notoʻgʻri, menimcha.
“Boshqa sohalarda ham attestatsiya boʻlarmikan yoki faqat oʻqituvchilar uchunmi?” Ustozlarim-a, attestatsiya hamma sohada bor. Faqat biz bilmaymiz. Chunki ular shov-shuv qilmaydi, shunchaki odatdagi ish tartibi, tizimning qoidasi deb qabul qiladi. Ularning ham sinovdan muvaffaqiyatli oʻtgani bor, oʻtmagani bor.. Oddiy misol, hayotda guvoh boʻlayotganim,albatta, temir yoʻl sohasida ishlayotganlardan biri, yaqinim, har uch oyda tashkiloti tomonidan ichki tartibga asoslangan sinovdan oʻtadi, uch yilda bir marta Bosh boshqarmasi tomonidan oʻtkaziladigan sinovdan oʻtadi. Agar oʻta olmasa-chi deysizmi, unda chilangarlik vazifasiga tushirilar ekan,yana oʻta olmasa-chi, unda qurilish brigadasida ishlar ekan. Shu holatlar amalda boʻlganmi? Albatta, boʻlgan. Ishlayman desa, oʻzini ishini mukammal bilishi kerak, axir, transport boshqaradi, odam tashiydi, yuk tashiydi. Har soniya masʼuliyat oldida javob berish kerak!
Ana... Biz-chi? Biz kasbimiz doirasida kimga va nimaga javobgarmiz?! Javob bir soʻzda: “Kelajakka!”
Jamiyatimizda boshqa kasblardagi kabi oʻqituvchi uchun imkoniyat katta. Faqat oʻqish, izlanish, yangilikka intilish, gʻoyalar yaratish va oqilona foydalanish lozim.
Aziz hamkasblar, xullas kalom, atrofingizdagi shunchaki gaplarga eʼtibor bermang! Attestatsiyadan muvaffaqiyatli oʻtishingiz tarafdoriman. Maqsadingiz yoʻlida sizga faqat va faqat omad tilayman!
P. S. ......... shunchaki fikr
Hamkasbingiz."
манба♻️
https://t.me/Education_bank
