Qalb oromi...

O‘n beshi yorug‘, o‘n beshi ...

Ba'zi insonlar uchun: "Oyning o‘n beshi yorug‘ bo‘lsa, o‘n beshi qorong‘u".🌗

Robbisi tomonidan berilgan har bir soniyasi uchun qalbidan hamd ayta oladigan mo‘min uchun esa: Oyning o‘n beshi yorug‘ bo‘lsa, yana o‘n beshi undan-da yorug'! 🌕✨

Ha aytganday, tagidagi naqshlar muallifi qizim, imzolari ekan. 😅

"Oyijon sizzi oyi diyman.
Oyijon sizzi etganizzi qimiman oyijon.
Adajonimmi etganlarini qilaman."

Oyilaridan xafamishla 😂

Yana bir og‘riqli nuqtani yozsam. Muammo deb qiyinlashtirgim kelmaydi. Yechilishi kerak bo‘lgan masala desam to‘g‘ri bo‘lar.

Yuqoridagi postni I bosqich deb yozdim. II bosqichni yozishga so‘z topa olmayapman. Sababi oddiy: arab tilini o‘qitish uchun o‘zbek bolajonlarga samarali darslik yo‘q hisob. Balki falon, falon kitoblar bor-ku, dersiz. Yo‘q, u kitoblar bolalarga o‘qitish uchun yaxshi natija bermaydi. Kattalar uchun mo‘ljallangan kitoblar esa ular uchun murakkablik qiladi. Aynan arab tilidagi kitoblarning aksariga ta'qiq borligini aytmay qo‘ya qolay.

Xullas, qachondir o‘zim davlat ro‘yxatidan o‘tgan, bolalar uchun arab tilini samarali o‘rgatadigan kitob chiqarsam yoki shunday kitob ko‘rib, u orqali ta'lim berib, yaxshi natijaga erishsam, balki postni davom ettirarman, inshaAlloh. Hozircha bu postga tanaffus berib turaman. 😐

Kecha xuddi shu xonada ustozning darslarini ko‘rib tahlil qilgandim. Bugun aynan shu xonada, xuddi shu soatda, xuddi shu doskaga yozib, shu proyektor nurlari oldida aynan arab tili fanidan dars o‘tdim. 😊

Qo‘shiqchilar, aktyorlar sahnaga chiqib, bu sahnalarga ustozlarimiz qadami yetgan, deb faxrlanib qo‘yisharmidi. 😉😄

Bilmaydigan kishi biladigan kishidan ko‘ra baxtliroq va xotirjamroq. Eng qizig‘i, u o‘zining baxtliroq ekanini ham bilmaydi. Bunday baxtlilarga havas qilmayman hech, chunki ular yong‘indan bexabarlar.

Bilgan saring, his etgan saring tashvishing ortaveradi. G‘aming ziyodalashaveradi.

Havas qiladiganlarim - haqiqiy g‘ami borlar va shu g‘am ko‘yida o‘zidan biror manfaat qoldiradiganlar, xuddi yong‘inda suv tashigan chumoli kabi.

Qaniydi, shu chumolidagi g‘ayrat, shijoat menda bo‘lsa...

I bosqich. Harflarni o‘rgatish.
1. Avvalambor, bolaning yoshiga qarab arab tilining qanday muhim ekanligini tushuntirib borasiz: 2-4 yosh oralig‘idagi bolalarga buni tushuntirish mushkul. Ammo 5 yoshdan oshgan bolaga arab tilini o‘rganish orqali Robbimizning kalomini o‘qishimiz, uni tushunishimiz mumkinligini yoshiga mos so‘zlar bilan tushuntirish mumkin. Undan avval bolaga Robbisini tanitish lozim. Albatta, u sizchalik anglolmasligi mumkin. Lekin shuncha yog‘ilayotgan ne'matlarni, ota-onasi, qarindoshlarini, tana a'zolarini, uyini, kiyimlarini, o‘yinchoqlarini, sevimli mashinasini, shokoladni-yu, u yoqtirgan barcha narsani unga aslida Kim berayotganini anglating. Shunda uning qalbida sekin-asta muhabbat uyg‘ona boshlaydi.

2. Ana endi, asosiy maqsadimiz - Qur'on o‘qish ekanligini tushuntirsak bo‘ladi. Uning qanchalik muhim ekanligini ham bola tushuna oladigan tilda tushuntiring. Bolada o‘z-o‘zidan rag‘bat uyg‘onsin. Majburlamang!

3. Bola ertaklar orqali dunyoni o‘rganadi. Tarbiya borasida eng samarali usul - ertak aytish. Namoz o‘qiydigan, doim ozoda yuradigan, Qur'on o‘qiydigan, yaxshi fazilatlarga ega qahramon haqida ertaklar aytib bering. "Oltin baliq"qa o‘xshagan, niyatlarini yaratiqlardan so‘raydigan ertaklarni umuman tavsiya qilmayman.

4. Qur'onni o‘qish uchun harflarni tanishi kerak ekanligini uqtiring. Do‘konga kirib pechenye olsangiz, arab harflari tushirilgan pechenye sotib oling. Harflarni oson eslab qolishga ko‘mak beruvchi ertaknamo kitoblar olib bering. "Qofjon" kitobi ham yaxshi variant. O‘g‘limda yaxshi samara berdi. Arab harflarning xarakter bilan sifatlanishi bolaning xotirasida oson qolishi uchun juda yaxshi usul ekan. Masalan, ك Kafbekning qaddi tik yigit ekanligi, ف Fabonuning peshonasida hindlarnikidek bittagina xoli borligi, ص SodAliyning eshikdan oldin qorni, keyin o‘zi kirishi, ض DodAliyning dodlaganini butun mahalla eshitishi, ش Shintoyning sharillatib kitob o‘qishi, ذ Zalhoji xola bilan ث Saxon kelinoyining tillari chuchuk ekanligi, ط ظ Tojon bilan Zojon egizak ekanligi-yu, shiddat bilan yurib kelayotgan ّ Tashdid aka o‘zi bilan ikkita harfni olib yurishi o‘g‘limga juda qiziqarli eshitilgan, kitobni yodlab olgan. Albatta, harflarni ham. Ayniqsa, ص ض ط ظ harflarini askarlar, ularni yo‘g‘on o‘qigin, deganim uchun endi yo‘g‘on qil, deb qayta-qayta aytishga hojat qolmayapti.
Shuningdek, harflar haqidagi qiziqarli multfilmlar ham yaxshi foyda beradi. (Postning tagida link qoldiraman)

5. Harflarni tanib olgach, kuniga 1 yoki 2 harfdan o‘yinga chalg‘ib ketish ehtimoli kam bo‘lgan vaqtda, fikr-u xayoli atrofdagilarga ketib qolmaydigan paytda kitob o‘qitishni boshlasangiz bo‘ladi. Chunki, atrofdagi bolalar o‘ynab yurgan paytda o‘qitsangiz, bola xohlamagan holda o‘tiradi yoningizda. Boshqa bolalar maza qilyapti-yu, u zerikarli ish qilayotgandek his qiladi o‘zini. Boshlanishiga 3-4 sahifalab o‘qitmang. Bitta harf yarim bet bo‘lsa, o‘sha kifoya qiladi. Zehni o‘tkir, yaxshi o‘qiyapti, deb tez-tez o‘qitib, harf kitobni tez tugatsangiz, keyinchalik yana qiynalasiz. Chunki, o‘qib, anglab, harflarni bir-biridan farqlab, miyaga yozilgunicha vaqt ham zarur. Kuniga 10ta harf o‘rganib, 3 kunda harfni tugatib, keyin o‘zi qiynalgan odam sifatida aytyapman buni. ))

6. Harflar kitobini tugatgach, albatta kichik bo‘lsa ham bayram qilib bering. Bola yaxshi ish qilsa, taqdirlanishini bilsin. Sovg‘a, shirinlik, o‘yinchoq, kiyim kabilarni boshqa payt ham shunchaki olib berasiz-ku. Harf tugatishiga oz qolganda, shu narsalarni bermay turib, bayramida bering. Qarabsizki, bola ham xursand, siz ham. ))

Arab tilini bolalarga o‘rgatishdagi tajribalarimdan bo‘lishishimni istaysizmi? 😊

Go‘zal sabr qiling, oyijon.

Kecha bolalarim Imom Buxoriy haqlaridagi multfilmni ko‘rishgandi. Unda go‘zal sabr haqida gap ketdi.

Bugun ertalab o‘qishga shoshib, telefonimni qidirib, asabiylasha boshladim.
Dono o‘g‘lim esa:
"Go‘zal sabr qiling, oyijon 😊", deb jilmayib turib meni doimgidek hayron qoldirdi. 😁

هذا الشبل من ذاك الأسد

Aslida dars tahlili uchun kirmoqchi edim. Ustoz majlisda ekanliklari uchun meni dars o‘tishga kiritishdi. Ustoz bilan bakalavrda o‘qigan kitobimiz Kamil B1dagi حكاية الثور والحمار mavzusiga kelishgan ekan. Taraddudsiz kirganim uchun darsni qanday o‘tishni bilmay, matnni tarjima qildira boshladim. Birozdan so‘ng ustoz:
"هذا الشبل من ذاك الأسد"
deb meni va o‘zlarini ko‘rsatib kirib keldilar.* 😁

Darsni davom ettirishimni, darsni kuzatishlarini bildirdilar. Men esa talabalar bilan matnni tarjima qilayotganimizni aytdim. Ustozim doimgidek yumshoqlik bilan: "Matnni tarjima orqali tushuntirish - uni o‘ldirish kabidir. Tarjima - sharhlashdagi eng kuchsiz, oxirgi chora", deb tarjima orqali dars o‘tishni ma'qul ko‘rmasliklarini bildirdilar. Ustozdan matnni o‘ldirganimiz uchun uzr so‘radim. 🥲

Mana shu tolibi ilmlikning eng qaymoq joyi: ustozingdan kamchiliklaringni eshitishing, ketayotgan noto‘g‘ri yo‘lingni to‘g‘ri yo‘lga o‘zgartirishing, ustozdan olganlaringni hayotga tatbiq qila olishing.



* Bu sher bolasi anavi sherning bolasi" ("Ot o‘rnini toy bosar" ma'nosida) Bu maqol bola otasiga, tolib ustoziga o‘xshagan paytlarda ishlatiladi.

Azob bermaydigan yagona muhabbat Xoliqqa nisbatan muhabbatdir.
Yaratiqlar nuqsoni bilan yaratilgan.
Nuqsonini ketkaza olmaysan.
Qalbingdagini yetkaza olmaysan. Senga berayotganlariga faqat sababchi ekanligini his etmas. Asl Beruvchi kim ekanini ko‘p ham o‘ylamas.
Seni hech biri U kabi anglamas. U kabi sen muhtoj bo‘lgan narsani bilmas.

Kimga muhabbat qo‘yishni o‘zing tanla.

Zid tuyg‘ular bir vaqtda jam bo‘lishi nodir holat. O‘sha onda nima qilishni bilmaslik eng yomoni...