MAJLISSiz majlis qilasiz uzundan uzun,
So‘z olib o‘zingiz so‘zga chiqasiz.
Xudo joningizga bersinda to‘zim,
Bu ketishda aniq yuzga chiqasiz.
Biz ko‘zga tiraymiz gugurtcho‘plarni,
Quloqqa tiqishga paxta izlaymiz.
Mabodo bizga ham so‘z tegib qolsa,
Sizning ma’ruzangiz haqda so‘zlaymiz.
Janob boshliq, axir qandoq qilaylik,
Sabrning kosasi to‘lib bo‘ldi-ku!
Bizga ish, sizga gap ekan qulaylik,
Ishlar nima bo‘lsa, bo‘lib bo‘ldi-ku.
Bir soat chaynadik bitta mavzuni,
Baribir topmadik bir tugal yechim.
“Masala ko‘rildi”, degan hujjatga
Imzo chekmaslikka yetmadi kuchim.
“Kimda gap bor?”, — deysiz majlis so‘nggida,
Aytgim keladi-yu, ayta olmayman.
Aytsam, kuni bo‘yi majlis bo‘ladi,
Keyin uyimga ham qayta olmayman.
© Islomjon Qo‘chqorov
Manba:Mushtum jurnali
✅𝐃𝐨‘𝐬𝐭𝐥𝐚𝐫𝐢𝐧𝐠𝐢𝐳𝐠𝐚 𝐡𝐚𝐦 𝐮𝐥𝐚𝐬𝐡𝐢𝐧𝐠!!!
⭕️⭕️⭕️⭕️
💬 𝐊𝐚𝐧𝐚𝐥𝐢𝐦𝐢𝐳!
👇👇👇
@Dehqonobod_uz ✅
