ЯКШАНБАДА ДАМ БЕРИНГ!

Дунё иши тугамас,
Давлат иши тугамас,
Тинкам қурир, етар бас!
Якшанбада дам беринг!

Болам кутар дада деб,
Хотин сўрар қайда деб,
Онам йиғлар болам деб,
Якшанбада дам беринг!

Тоғам ўтди бормадим,
Тўйлар бўлди бормадим,
Лек мажлис қолдирмадим,
Якшанбада дам беринг!

Дўсту ошна йўқ ҳисоб,
"Дастур"ларим беҳисоб,
"Йўл харита" бир китоб,
Якшанбада дам беринг!

Умр ўтар шиддат-ла,
Болам ўсди бир пастда,
Ўтирволиб кабинетда,
Якшанбада дам беринг!

Айбим битта бюджетдан,
Маош келар давлатдан,
Тўйиб кетдим бу ишдан,
Якшанбада дам беринг!

Ҳашарлар бозор куни,
Шанбалик бозор куни,
Мажлислар бозор куни,
Якшанбада дам беринг!

Ишимнинг йўқ охири,
Тонгдан тунга, кунгача!
Ёрилмасдан бу бошим,
Якшанбада дам беринг!

Ҳоким бўлсанг, ўзингга,
Прокурор бўлсанг, ўзингга,
ИИБ бўлса, ўзингга,
Якшанбада дам беринг!

"Кодекс" ҳам чириб кетди,
Миям ҳам ачиб кетди,
Соат тунги ўн икки,
Якшанбада дам беринг!

Мажлис қилсанг, бормайман,
Саккиз соат ишлайман,
Шанба-бозор ётаман,
Шундай хаёл қиламан,
Якшанбада дам беринг!