Arabboy Rejabboyev | Blog

1% yomonroq

Hozirgi vaqtda odamlar borgan sari sabrsiz va jahldor bo‘lib bormoqda. Navbatda turish, internetning sekinlashishi kabi kichik narsalar odamni bir zumda agressiv holga keltiradi. Agressivlik esa inson xulqini va jamiyatdagi munosabatlarni butunlay o‘zgartirib yuboryapti.

Jeyms Klirning ‘Atom odatlar’ kitobida 1% qoidasi keltirilgan. Unga ko‘ra, kichik o‘zgarishlar vaqt o‘tishi bilan katta natijalar beradi. Har kuni 1% yaxshilansangiz, yil oxirida 37 baravar yaxshi bo‘lasiz. Ammo kichik ishlarga bo‘lgan agressivlik 1% yomonlashsa holat ancha og’irroq bo’ladi.

Tasavvur qiling: birinchi kuni yo‘lda bir mashina sizga signal beradi, siz faqat ichingizda ozgina g‘azablanasiz, lekin hech narsa demaysiz. Bir oy o‘tib, xuddi shu holatda endi ovoz chiqarib so‘kinasiz, chunki sabrsizligingiz 1% ga oshgan. Olti oy o‘tib, signal bergan haydovchiga derazangizni ochib baqirasiz. Yil oxirida esa mashinadan tushib, o‘sha haydovchi bilan janjallashishga tayyor turasiz.

Bu jarayon asta-sekin bo‘lgani uchun o‘zgarishni sezmaysiz, lekin oxirida xulq-atvoringiz butunlay boshqacha bo‘lib qoladi. Bu shaxsiy hayotda stress, ruhiy charchash, do‘stlar va oila bilan munosabatlarda buzilish keltiradi. Jamiyatda esa bunday kichik nizolar katta mojarolarga aylanadi.

Lekin bu jarayonni teskari yo‘naltirish mumkin. Har kuni 1% sabrliroq bo‘lish uchun jahlingiz chiqadigan holatlarni yozib boring. Shu holatga tushganingizda esa ularga yaxshiroq javob qaytarishga harakat qiling.

Ideal o‘zingizni tasavvur qiling – u qanday xotirjam va oqil harakat qilardi? Siz ham shunday qiling.

3-hadis:
Анас розияллоҳу анҳудан ривоят қилинади:
Расулуллоҳ соллаллоҳу алайҳи васаллам:
«Вафот этган кишининг ортидан уч нарса бирга боради. Улар: аҳли, мол-дунёси ва амали. Лекин иккови, яъни аҳли ва моли қайтиб келиб, биттаси, яъни амали бирга қолади», дедилар.

@Arabboy_Rejabboyev

Darajot

Bu dunyoda kim yuqori darajaga erishgan bo‘lsa, ularning barchasi ilm bilan erishgandir. Dunyoning eng boy 50 ta insoni ham boshqalardan ko‘ra qaysidir jihatdan ilmliroq bo‘lib chiqadi. Masalan, Bill Geyts 1995-yildan 2007-yilgacha (2008-yildan tashqari) hamda 2009, 2013-2017-yillarda dunyoning eng boy odami bo‘lgan. Umumiy hisobda 18 yil davomida dunyoning eng boy odamlari ro‘yxatida birinchi o‘rinni egallagan.

2017-yildan boshlab, qaysidir jihatdan Geytsdan ko‘proq bilimga ega bo‘lgan Jeff Bezos Geytsga qaraganda ilmga asoslangan risklarni ko‘proq qilgani uchun 3 yil davomida yetakchilik qildi.

Ilon Mask ilmda Bezosdan ham o‘tib ketgani va shu sababli juda katta risklarni qila olgani uchun ham 2021-yildan beri dunyoning eng boy odami bo‘lib kelmoqda.

Maskning yetakchi qilgan xususiyatlari:
1. Chegaralarni buzib o‘tishi.
(Odamlar oldida uddalab bo‘lmas ishlarni qilishi uning obro‘sini va unga bo‘lgan ishonchni yanada oshirib yuborgan.)
2. Shaxsiy brendiga bo‘lgan e’tibor.
(Obro‘si va Twitterdagi postlari kompaniyasining aksiyalarini bir kunda o‘nlab milliard dollarga o‘sishiga sabab bo‘lgan.)

Boshqalardan ilmda ko‘proq narsani bilgan hamda o‘z davridagi eng zarur bo‘lgan tor ilmlarni o‘rgangan insonlar o‘sha davrning yetakchilariga aylanib borishadi.

Avval ham shunday edi. Dunyoda matematika ilmi yo‘q bo‘lganda, Al-Xorazmiy algoritmga asos solib, davlat ishlarini yuritish uchun zamin yaratdi. Nomi ham tarixda qoldi, davlat ham kuchli bo‘ldi. Bunga misol qilib, Ibn al-Haysam, Ibn Sino, Beruniy, Al-Idrisiylarni ham keltirish mumkin.

Ilmda kuchli bo‘lgan insonning bu dunyoda darajoti aniq baland bo‘ladi. Agar u insonda iymon ham bo‘lsa, u dunyodagi darajoti ham baland bo‘ladi.

Набий соллаллоҳу алайҳи вассалам:
"Ким илм талаб қилиб йўлга чиқса, Аллоҳ унга жаннат сари йўлни осон қилиб қўяди."
(Imom Buxoriy rivoyati)

@Arabboy_Rejabboyev

Sabablarni ko‘paytirishimiz kerak

Himmatimizning katta bo‘lishiga ustozlarimizning qilgan nasihatlari katta o‘rin tutadi. Ularni eshitgach, orzu-maqsadlarimni anchagina to‘g‘rilab olgan edim.

Ustozim shunday nasihat qilgan edi:

“Kimki Alloh uchun bir ishni qilib, shu ish ustida vafot etsa, ish yakunlanmagan bo‘lsa-da, uning qilinganlik savobi beriladi. Biz natijalardan emas, sabablardan so‘ralamiz. Shuning uchun maqsadni katta qilib, kattaroq ishlarga harakat qilishimiz bu dunyoda natija bermasa ham, albatta u dunyoda natija beradi.”

Abdulloh ibn Muborak hazratlari: “Kishining qayerdan kelgani emas, qayerga ketayotgani muhim,” deb aytganlar. Qayerga qarab ketayotganini esa nima ishlar qilayotganidan bilish mumkin.

Siz bugungi kunda nima ishlar qilyapsiz? Bu – qayerga ketayotganingizni belgilaydi. Katta va aniq maqsadlarni belgilamagan bo‘lsangiz ham, hozirgi qilayotgan kichik sabablaringizning o‘zi uni belgilab beradi.

“Sababchi bo‘lgan qilgan bilan barobardir,” degan hadisga muvofiq, Ramazon oyida har kuni bir hadis va shunga oid bo‘lgan bir ma’lumotni blogga joylab borishni niyat qildik.

1-hadis:

“Ummatimdan qaysi kishi sunnatimdan qirqta hadisni yod olsa, qiyomat kunida uni shafaatim ostiga kiritaman.”

@Arabboy_Rejabboyev

Ideal o‘zingiz bo‘lsin

Bir ishni qoyillatib bajarish uchun har doim ham uni avval sinab ko‘rgan bo‘lish shart emas. Ba’zan birinchi bajarishdayoq, uni o‘n marta bajargandan ham yaxshiroq uddalash mumkin.

Istalgan soha bo‘lsin, barcha to‘g‘ri qarorlarni ustoz yordamida qabul qilish shart emas. (Bu, ustoz tutmang degani emas.)

Har doim ham yoshlikda xatolar qilib, keyinchalik ulardan saboq chiqarib, natijaga erishish shart emas.

Yuqoridagi barcha jarayonlarni birinchisidayoq mustaqil ravishda to‘g‘ri bajarishingiz mumkin. Buning uchun o‘zingizning ideal holatingizni tasavvur qilishingiz kifoya.

Tasavvuringizdagi ideal o‘zingiz do‘sti bilan qanday gaplashgan bo‘lar edi – siz ham shunday gaplashing.

Ota-onasiga hurmati, ustozga mulozamati, katta-kichik jarayonlardagi qarorlarni qanday qabul qilgan bo‘lardi – siz ham shunday qiling.

Odamlarga munosabati, omma oldida o’zini tutishi, kunlik qilayotgan yaxshi odatlari qanday bo’lardi - siz ham shunday qilishingiz kerak.

Hayotingizda biror muhim qarorga duch kelsangiz, bir zum to‘xtang va ideal o‘zingiz nima qilishini o‘ylab ko‘ring va shuni bajaring.

Kunlarimni tahlil qilganda, bugungi qilgan ishlarim idealimdagi Arabboy qilishi kerak bo’lgan ishlar bilan mos yoki yo‘qligini tekshirishim – tezroq o‘rganish, tezroq rivojlanish imkonini beradi.

@Arabboy_Rejabboyev

Sababchi bo'lgan qilgan bilan barobardir.

Ba'zan yozishga vaqt topolmaymiz, ba'zida yozish uchun ma'lumot ham, lekin qo'limizdan kelgan kichik yaxshiliklarda bardavom bo'lish shaxsiyatimizni kuchaytirishga yordam beradi.

Befoyda xarakatlar qonuni nazariyasiga ko'ra 10 bet kitob o'qish sizni aqlli qilib qo'ymaydi, yoki biror natijaga olib chiqmaydi. Ammo mana shu harakatlar yig'ilib katta natijalarga olib keladi. Bizni vazifamiz mana shunday kichik ammo foydali bo'lgan ishlarda bardavom bo'lishdir.

@Arabboy_Rejabboyev

Rizqingni sendan boshqa insin ololmaydi

Amalingni sendan boshqa inson qila olmaydi

Allohda yashirina olmasang shunga yarasha harakat qil

Kim qalbini nimaga bog’lasa Alloh uni shu narsaga topshiradi

@Arabboy_Rejabboyev

Biz unutayotgan odoblar

Musulmonlar unutayotgan odoblarni chatGPT ro'yxat qilib berdi. Ro'yxatni o'zgartirmasdan yuboryapman.

1. Salom berish: Oldin tanimagan odamga ham "Assalomu alaykum" deyish odati bor edi, hozir ko'pchilik bundan uyalib qolgan.

2. Shirin so'zlilik: Og‘izdan chiqayotgan gapga e’tibor yo‘q. Qattiq gapirsa ham, xafa qilishdan qo‘rqmaydi.

3. Va'daga vafo: "Qilaman" deydi-yu, keyin esidan chiqarib yuboradi yoki umuman qilmaydi.

4. Qo‘shnichilik: Qo‘shniga yordam berish, holidan xabar olish unutilib boryapti.

5. Hazilning chegarasi: Kuldiraman deb birovni ranjitib qo‘yayotganini o‘ylab ham ko‘rmaydi.

6. Ota-onaga hurmat: Ba'zan ota-ona o‘z farzandidan mehr kutib yashashga majbur bo‘lyapti.

7. Halollik: Savdoda, ishda aldov ko‘payib, halollik chekkaga surilyapti.

8. Jamoat namozlari: Masjidlarga qatnash kamaygan, ayniqsa bomdodga.

9. Hamdardlik: Birov yordam so‘ramasa, hech kim o‘zidan o‘zi qo‘l cho‘zmayapti.

10. Hayo: Kiyinishdan tortib, gap-so‘zgacha hayoning izi kamayib ketgan.

11. Ilm talab qilish: Diniy yoki dunyoviy bo‘lsin, chuqur bilim olishga ishtiyoq sustlashgan.

Sun'iy intellekt ro'yxat so'ngida "O'zimizdan boshlab o'zgartiraylik, bularni birga tiklaylik" deb so'zini yakunladi.

@Arabboy_Rejabboyev

Agar bu savollarning javobi “yo‘q” bo‘lsa, hayotingizda nimanidir o‘zgartirishingiz kerak.

Bu postni o‘qiyotganda sizni chalg‘itadigan narsalardan xalos bo‘lib, xotirjam bo‘ling. Har bir savolga ichingizdan teran o‘ylab javob bering:
1. Siz eng ko‘p muloqot qilayotgan to‘rtta inson bilan bir umr birga yashasangiz, o‘zingiz xohlagan natijaga erisha olasizmi?
2. O‘zingizni butun umr vaqt o‘tkazishga arziydigan inson deb bilasizmi?
3. Kamida mingta insonga foyda beradigan eng kuchli istagingiz bormi?
4. Har kunlik tashlayotgan qadamlaringiz orzularingizga yaqinlashtiryaptimi yoki uzoqlashtiryaptimi?
5. Oxirgi marta qachon telefoningizdan bir kunda ikki soatdan kam foydalandingiz?
6. Farzandingiz sizdek qaror qabul qilib yashasa, rozi bo‘lasizmi?

@Arabboy_Rejabboyev

Maqsadning o‘zi yetarli emas

Statistikaga qaraganda, yangi yildan chekishni tashlashni boshlagan erkaklarning 92 foizi buni uddalay olmaydi. Ozishga ahd qilganlarning 95 foizi esa vaqt o‘tib yana semirib ketadi. Yangi yilni go‘zal niyatlar bilan boshlaganlarning 88 foizi ularni bajarishga vaqt topa olmaydi.

Dastlab katta ishtiyoq bilan boshlaysiz. Ammo kunlardan bir kun bu ishtiyoq qayoqqadir yo‘qoladi.

Har qanday ishtiyoq kun kelib yo‘qolishi mumkin, lekin ishtiyoq yo‘qolganda ham bu ishni davom ettirishingiz uchun sabablar topib qo‘yishingiz kerak. Bu sabablar sizni ishtiyoq yo‘qolganda ham bajarishga undashi zarur.

To‘g‘ri niyat va to‘g‘ri maqsad sizni o‘tirgan joyingizdan qo‘zg‘atolmasligi mumkin. Faqatgina maqsadga erishishga xalaqit qiluvchi ishlarni bartaraf qilish natijaga olib boradi.

Yugurish poygasiga chiqqan 100 ta sportchining birortasi ham 2-o‘rinni olish niyatida tayyorgarlik ko‘rmaydi. Ammo ularning ichida maqsad tomon eng ko‘p harakat qilgani, ishni doimiy davom ettira olgani va ishtiyoqni kutmasdan o‘zini majburlagani, 100 ta inson qo‘ygan to‘g‘ri maqsadga bir o‘zi erishadi.

@Arabboy_Rejabboyev

Bu insonlardan maslahat olmang

Noto‘g‘ri maslahat butun hayotingizni barbod qilishi mumkin.

Insonlar uchun eng oson ish maslahat berish bo‘lib qolgan. Ko‘pchilik kimdan maslahat olayotganiga eʼtibor bermasdan katta xatolarga ham yo‘l qo‘yishmoqda.

Maslahat olmasligingiz kerak bo‘lgan insonlarni aniqlashda quyidagi ko‘rsatmalarga amal qiling:
1. Ilmi va tajribasi yetarli bo‘lmagan insonlar.
Ular odatda nazariy teoriyalarga asoslanib maslahat berishadi, amaliyot esa boshqacha bo‘lishi mumkin.
2. Ko‘proq o‘z manfaatini o‘ylaydigan insonlar.
Ular boshqalarning manfaatini kam o‘ylaganligi sababli, maslahatlari yetarli darajada foydali bo‘lmaydi.
3. O‘zgalarni ko‘p tanqid qiladigan insonlar.
Ular odatda yordam berishga emas, tanqid qilishga va shu orqali o‘zlarini yaxshi ko‘rsatishga harakat qilishadi.
4. Hissiyotga ko‘p beriladigan insonlar.
Bunday odamlar hissiyotga tayangan holda reallikni unutishadi va maslahatlari ham haqiqatdan uzoq bo‘lishi mumkin.

Agar maslahat olayotgan insoningiz yuqoridagi xususiyatlardan biriga ega bo‘lsa, katta ehtimol bilan xato qilayotgan bo‘lishingiz mumkin.

@Arabboy_Rejabboyev

Tonnalagan ma’lumot foydasiz

Insonlarni bilishga emas, balki bajarishga undaydigan harakatlar ko‘proq rivojlantiradi.

Ertalab erta turish va kechqurun erta uxlash kerakligini bilasiz. Esingizni taniganingizdan beri bu qoida sizga tanish, ammo doimiy erta turish va erta uxlash bilan muammoingiz bor.

Har qancha erta uxlash va uyg‘onishning foydalarini eshitsangiz ham, o‘qisangiz ham bu muammo bilan qiynalaverasiz.

Bunday holatda tonnalab ma’lumotdan ko‘ra, quyidagi kichik amallar foydaliroq bo‘ladi:
• Uxlashdan 2 soat oldin ovqatlanmaslik.
• Bir soat oldin elektron gadjetlardan foydalanishni to‘xtatish.
• Xonani qorong‘iroq qilish.
• Uxlash o‘rnini almashtirib ko‘rish.

Uyquda melatoninning ahamiyati, chuqur va yuzaki fazalari, uyqudan ko‘proq energiya olish mumkin bo‘lgan vaqtlar haqidagi minglab maʼlumotlarni bilsangiz ham, yuqoridagi ishlarni amalda qilmasangiz, muammoingiz hal bo‘lmaydi.

Natijaga olib boradigan maʼlumotlarni tonnalab yig‘ishni to‘xtating. Natija uchun kerakli bitta sababni paydo qiling. Kerakli bilimlarni miya jarayon davomida talab qiladi va ularni shu vaqtda o‘zlashtirish samaraliroq bo‘ladi.

@Arabboy_Rejabboyev

Kitob natijaga olib chiqmaydi

Kitob hayotni o‘zgartirmaydi, u shunchaki vosita. Insonning qilayotgan harakatlari ko‘proq ahamiyatga ega.

Tajribalar ko‘proq esda qoladi va his qilinadi. Ularni faqat miya bilan emas, qalb va tana bilan ham sezish mumkin.

Biror narsaning og‘rig‘ini kitobdan qancha o‘qisangiz ham his qilib bo‘lmaydi. His qilinmagan ma’lumotlardan esa inson kamroq saboq chiqaradi va bu xatoni qilmaslikdan kamroq qochadi.

Insonni muvaffaqiyatli qiladigan ham, dono qiladigan ham – uning tajribasi.

Kitobdan olingan ma’lumotlar sizga o‘z tajribangizga o‘xshash bo‘lgan tajribalarni o‘rganishga yordam beradi. Shu orqali og‘riqni his qilib, qilgan xatolaringizga o‘xshash xatolarni qayta qilmaslikni o‘rganasiz. Agar kitob o‘qimasangiz, avvalgi xatolaringizga o‘xshash bo‘lgan xatolarni takrorlayverasiz.

Demak, tajribasiz o‘qilgan kitob – keraksiz xilma-xillik xolos. Kitobsiz qilinayotgan tajriba esa o‘xshash xatolar xilma-xilligini oshiradi, xolos.

@Arabboy_Rejabboyev

To‘g‘ri o‘zgarish

Ko‘pincha biz keraksiz va noto‘g‘ri narsalarni o‘zgartirishga harakat qilamiz. Natijada, noto‘g‘ri natijalarga erishamiz.

Yaxshi oylik olish uchun ish joyini emas, insonlarga berayotgan qiymatingizni o‘zgartirish kerak. Muvaffaqiyatga erishish uchun amaldor tanishlarni emas, kunlik harakatlaringizni o‘zgartirish kerak. Sog‘lom tana uchun shifokorni emas, hayot tarzini o‘zgartirish kerak.

To‘g‘ri o‘zgarish qilishning noto‘g‘ri o‘zgarish qilishdan farqi quyidagicha:
1. O‘zgartirish qilish qismi faqat sizga bog‘liq bo‘ladi.
2. Hozirgi harakat 5-10 yildan keyin qayta takrorlansa, hozirgidek ijobiy natija beradi.

Hayotingizda qanday o‘zgarishlar qilishingiz mumkin? Yuqoridagi ikki filterni qo‘llab, sinab ko‘ring.

@Arabboy_Rejabboyev

Tanangiz voz kechmasin

Inson organizmi hayratlanarli darajada moslashuvchan. Odatda organizmdagi ba’zi organlar ishini boshqasi qila olmaydi. Ammo vaqt o‘tishi bilan har qanday organ bir-birini to‘ldirishi mumkin.

Masalan, qizilo‘ngachida muammosi bor insonning oshqozoni tomog‘iga olib chiqib tikib qo‘yilsa, oshqozon qizilo‘ngach vazifasini bajarib ketaveradi. Oshqazon olib tashlansa, ichaklar oshqozon vazifasini bajaradi. Yoki ichaklardan biri olib tashlansa, uning o‘rnini boshqasi to‘ldiradi. Vaholanki, ularning har biri maxsus oqsillar ishlab chiqaradi va har biri boshqasi bajarolmaydigan funksiyalarni bajaradi.

Organizm Alloh tomonidan o‘ziga kerakli funksiya uchun boshqa organlarni ham moslashtira oladigan qilib dasturlangan. Shu bilan birga ishlamayotgan organlardan voz kechish uchun ham.

Agar kerakli yuklamani berib tursangiz, organizm bu funksiyani bajarish uchun boshqa organlarni moslashtirib oladi. Ammo yuklama berishni uzoq muddat to‘xtatsangiz, organizm o‘zi undan voz kechadi.

Endi yuqoridagi har bir jumlani miyangiz va muskullar misolida o‘qib chiqing. Organizmingiz o‘zi undan voz kechmayaptimi?

@Arabboy_Rejabboyev

Ruhiy kuch

Kishini o‘ziga qo‘yadigan ixtiyoriy cheklovlar uning ruhiy kuchini anglatadi. Kim o‘z ixtiyori bilan keraksiz yoki zararli narsalarga uzoq muddat cheklov qo‘ya olsa, u boshqalardan ruhiy jihatdan kuchliroq bo‘ladi.

Masalan, ijtimoiy tarmoqlarga 10 kun kirmaslikka va’da bergan inson, uchinchi kunda va’dasini buzgan bo‘lsa, uning ruhiyati ancha zaifroq sanaladi.

Ruhiy kuchni ikki narsa bilan o‘lchash mumkin:
1. Qodir bo‘lib turgan narsalarga davomli cheklov qo‘ya olish.
2. Ko‘pchilik qilishi qiyin bo‘lgan foydali ishlarni davomli qila olish.

Ushbu ikki jihatdan birini ham davomli qila olmayotgan insonning jamiyatni o‘zgartirish yoki atrofni to‘g‘rilash haqidagi gaplariga ehtiyotkorlik bilan yondashish kerak. Chunki ruhiy kuchsiz insonning bu ishlari ko‘pincha nafsi tomon yo‘nalib ketish ehtimoli yuqori.

@Arabboy_Rejabboyev

Diqqat va Muvaffaqiyat

2000-yilda Microsoft tomonidan o‘tkazilgan tadqiqot shuni ko‘rsatdiki, o‘rtacha inson diqqatini saqlash davomiyligi 12 soniya edi. 2015-yilda o‘tkazilgan shunga o‘xshash tadqiqotda esa bu ko‘rsatkich 8 soniyaga tushganligi aniqlandi.

Diqqatni ushlab turish qobiliyati haqidagi so‘nggi faktlar shuni ko‘rsatadi:

1. 47% odamlar aytishicha, ular ikki soatdan ortiq bir vazifaga diqqat qarata olmaydilar.
2. O‘rtacha inson telefonini kuniga 58 marta tekshiradi.
3. 75% odamlar boshqa narsalarga chalg‘imasdan diqqatni bir vazifada ushlab tura olmaydilar.
4. O‘rta hisobda insonlar har kuni ijtimoiy tarmoqlarda 1 soat 40 daqiqa vaqt o‘tkazadilar.
5. O‘rtacha insonning diqqatni ushlab turish vaqti, mobil qurilma ishlatganda, kompyuter bilan solishtirganda qisqaroq bo‘ladi.
6. 90% odamlar uchrashuvlarda xayol surib o‘tirishini tan oladi.
7. Diqqatni ushlab turish vaqti, bir nechta vazifalarni bajarishga qaraganda, bitta vazifaga qaratilganda qisqaroq bo‘ladi.

Zamonaviy dunyoda olamshumul yangiliklarni qilish, yaxshi karyera qilish va qiymatli insonga aylanish uchun diqqat bilan ishlash juda muhim.

Har qanday zamonda muvaffaqiyatga erishish uchun talab qilinadigan ko‘nikmalar bo‘yicha boshqalardan ozgina farqli bo‘lishning o‘zi kifoya qilgan.

Hozirda siz farqli bo‘lishingiz kerak bo‘lgan jihat – diqqatdir.

@Arabboy_Rejabboyev

Nafs

Hazrat Ali jangda dushmanni mag‘lub qilib, bo‘yniga qilich tortaman deb turgan edilar. Shu payt dushman ularning muborak yuzlariga tupurdi. Hazrat Ali qilichni tushirib, “Seni o‘ldirishdan voz kechdim, ketishing mumkin,” deb aytdi. Voqeadan hayratlangan dushman nega o‘ldirishdan voz kechganini so‘radi. Hazrat Ali shunday javob berdilar: “Yuzimga tupurishingdan avval seni Alloh roziligi uchun o‘ldirmoqchi edim, tupurganingdan keyin esa sendan jahlim chiqdi. Agar mana shu g‘azablangan holimda qatl etsamu o‘z nafsim uchun o‘ldirgan bo‘lur edim. Bu esa oxiratda menga hech qanday foyda bermaydi, balki ziyonim uchun xizmat qilishi mumkin.” Hazrat Alining naqadar go‘zal axloqda ekanini ko‘rgan kishi bu axloqdan hayratlanib, Islomni qabul qildi.

Bizning ko‘pchiligimiz nafsimiz aytayotgan ko‘p istaklarni so‘zsiz bajarishga o‘rganib qolganmiz. O‘zingizga savol berib ko‘ringchi, qachon oxirgi marta nafsingiz istagan narsani qodir bo‘la turib bermadingiz?

@Arabboy_Rejabboyev