Mukammal yaratilgan san’at asari tomoshabinni uzoq o‘yga toldirishi, xayolot olamiga olib kirishi, ma’naviy ozuqa, estetik zavq bag‘ishlashi muqarrar. Suratlardagi tiriklik, yashashga bo‘lgan intilish, go‘zallik, tasviriy san’at asari ixlosmandlarini o‘ziga jalb etib, maftun etmay qolmaydi, albatta. Jumladan, O‘zbekiston xalq rassomi Akmal Nurning rangtasvirida muhabbat, oila, haqiqat, anglash, uyg‘unlik singari abadiy qadriyatlar o‘z aksini topadi.

Akmal Nur 1959-yil Namanganda tug‘ilgan. 1984-yilda Toshkent davlat teatr va rassomlik san’ati institutini tamomlagan. 1990-yildan O‘zbekiston Badiiy akademiyasining ijodkor uyushmasi a’zosi. Hozirgi kunda O‘zbekiston Badiiy akademiyasiga rahbarlik qilib kelayotgan Akmal Nur mo‘yqalamiga mansub ko‘plab asarlar Xitoy, AQSH, Hindiston, Shveytsariya kabi yirik davlatlar muzeylari hamda xususiy kolleksiyalarning qimmatli mulki sanaladi.