Nurullokh Kamalkhujaev | 9.0

3/3

O’qish va boshqa bahonalar bilan postni tugatishga endi vaqt topdim. Nyu-Orleanz shahriga mintaqaviy rivojlanish bo’yicha konferensiyada sobiq Sovet Ittifoqi shaharlari bo’yicha tadqiqotimni taqdim etish uchun borgan edim. 2024 yilning eng esda qolarli tajribalaridan biri bo’ldi.

Konferensiya so’ngida taqdirlash marosimi bo’lib o’tdi. Taxminan 300 tadqiqotchi qatnashgan edi. Men sakkiz kishilik bir stolga joylashdim. Dastlab, stoldagi har kim o’zini tanishtirdi. Navbat menga kelganda, o’zimni tanishtirib, “Land of Uzbeks” deb O’zbekistondan ekanligimni aytdim. Ba’zilar odatdagidek qayerdaligini so’rashdi, men esa qisqacha tushuntirib o’tdim. Bu orada stoldagi yoshi kattaroq Yevropalik ayol bir oy oldin O'zbekistonda bo'lganligini aytdi. U yaqinda Samarqandga ilmiy safar qilgan ekan va O’zbekiston haqida qiziqish bilan gapirib berdi. U Movoraunnahrning o’rta asrlarda ta’lim va madaniyat markazi bo’lganligi, o'sha paytning Nyu Yorki bo'lganligi, Samarqand va Buxoroning go’zalligi haqida so’zlab, stoldagilarni hayratga soldi. Shundan keyin bir necha kishi O’zbekistonga safar qilishga jiddiy qiziqishini ham bildirdi.

Mana shu samimiy suhbatdan 10-15 daqiqa o’tib, talabalar o’rtasida eng yaxshi tadqiqot sovrinini e’lon qilish boshlandi. To’g’risi, buni umuman kutmagan edim, lekin boshlovchi ismimni qiynalib talaffuz qilishni boshlaganida hayratga tushdim. Alhamdulillah, tadqiqotim eng yaxshi talaba yozgan maqola deb e’tirof etildi. Stoldagilar bu yutuqni boshqacha xursandchilik bilan qarshi olishdi. Men uchun bu o’ziga xos sharaf edi, chunki oldingi yillarda bu sovrinni yetakchi universitetlar bitiruvchi talabalari yutib kelgan ekan. Aslida juda juda kichik bir sovrin, lekin hayolimdan birinchi o'tgan o'y ish qilib bu mening cho'qqi nuqtam bo'lmasin va g'ururlantirib qo'ymasin degan xavotir bo'ldi. Bu ilm talabgorlarida ham ko'p uchraydigan va haqiqatga osongina aylanishi mumkin bo'lgan xavotir. Shaxsan menga o'limni eslash, tarixda o'tgan va hozirgi yetuk olimlarning ishlariga boqish, va albatta boshqalardan eslatmalar yordam beradi.

Yana suhbat davomida, stoldagilar mendan hozir O’zbekistondagi ilm-fan va tadqiqotlar holati haqida so’rashdi. Chuqur nafas olib, mavjud vaziyatni tushuntirdim va albatta kelajakka nisbatan umid borligini ta’kidladim. O'zbekistonga ilmiy safarga borgan yevropalik ayol ham mamlakat mintaqaviy rivojlanish sohasida ko'proq yuqori darajadagi olimlar kerakligini ta'kidladi.

Mamlakatda ilm-fan dunyo darajasida ildamlashi uchun bir sohaning o'zida yuzlab va undan ko'p dunyo darajasidagi olimlar kerak bo'ladi. Hozircha men iqtisodiyot sohasida yuqori reyting jurnallarda maqola chop etish natijalardan kelib chiqib O'zbekistonlik bunday darajadagi (hurmat saqlagan xolda) 1-2 ta olimni bilaman holos (masalan), balki ko'proqdir.

Blog ochganimga deyarli bir yil bo'libdi. Birinchi postimdagi hadisni yana eslatma uchun qoldiraman:

Imom Abu Bakr al-Bayhaqiy sahoba Abu Dardodan (r.a.) rivoyat qilgan hadisda "Yo olim bo'l, yo shogird bo'l, yo tinglovchi bo'l yoki (ilmga) muhabbatli bo'lgin. Beshinchisi bo'lma, halok bo'lasan" deyilgan (Sunan al-Kubroga Kirish 277).

@musofir_iqtisodchi