Ashuro kunining ro'zasi
"Ashuro" so‘zi lug‘atda "o‘ninchi" degan ma'noni bildiradi. Muharram oyining o‘ninchi kuni Ashuro nomi bilan mashhurdir. Bu kun barcha ummatlar tomonidan qadimdan hurmatlab kelinadigan fazilatli kundir. Islom kirib kelgan davrda nasroniylar ham, yahudiylar ham bu kunni ulug‘lashardi.
Payg‘ambarimiz sollallohu alayhi vasallam ham Ashuro kuni ro‘za tutganlar, sahobalariga ham ro‘za tutishni buyurganlar. Buni eshitgan ba'zi sahobalar bu kunni boshqa din vakillari ham ulug‘lashini eslatishgan, shunda Rasululloh sollallohu alayhi vasallam:
"Unday bo‘lsa, kelasi yili muharram oyining faqat o‘ninchi kunida emas, to‘qqizinchi kunida ham ro‘za tutamiz", dedilar. Shuning uchun mo‘min-musulmonlar muharram oyining 9-10-kunlari ro‘za tutadilar.
Ashuro kunining ro‘zasi nihoyatda fazilatli nafl ibodatdir. Nabiy sollallohu alayhi vasallam: "Umid qilamanki, Ashuro kunining ro‘zasi o‘tgan yilning gunohlariga kafforat bo‘ladi", deganlar.
Ali roziyallohu anhudan rivoyat qilinadi:
Bir kishi Rasululloh sollallohu alayhi vasallamga: “Ey Allohning Rasuli, Ramazondan keyin qaysi oyda roʻza tutishimga buyurasiz”, dedi. Shunda u zot:
“Agar Ramazondan keyin roʻza tutmoqchi boʻlsang, muharram oyida tutgin. Chunki u Allohning oyidir, unda bir qavmning tavbasini qabul qilgan yana boshqa qavmlarning ham tavbasini qabul qiladi”, deb javob berdilar". Imom Termiziy rivoyati
Ashuro kunining fazilati
Ibn Abbos roziyallohu anhumodan rivoyat qilinadi:
"Paygʻambarimiz sollallohu alayhi vasallam Madinaga kelganlarida yahudiylarning Ashuro kuni roʻza tutayotganini koʻrib: “Nima bu? (yaʼni, nima uchun bu kun roʻza tutyapsiz?)”, - dedilar. Ular: “Bu yaxshi kundir. Bu kunda Alloh taolo Bani Isroilga dushmanlaridan najot bergan. Shuning uchun Muso roʻza tutgan”, - deb javob berishdi. Shunda u zot: “Men Musoga sizlardan koʻra haqliroqman”, - dedilar va shu kuni roʻza tutdilar hamda boshqalarni ham roʻza tutishga buyurdilar".
Imom Buxoriy rivoyati
Ashuro kuni ahliga kenglik qilish
Ashuro kunining yana bir ajoyib fazilati, xislati bor. Mo‘min-musulmonlar bu kunlari ro‘zg‘orni but qilib qo‘yishlari sunnatdir.
Abu Hurayra roziyallohu anhudan rivoyat qilinadi:
“Rasululloh solallohu alayhi vasallam: "Kim Ashuro kunida ahli ayoliga kenglik qilsa, Alloh taolo unga yilning qolganini keng qiladi”, dedilar".
Bayhaqiy rivoyati
📌 Shuningdek, Ashuro kunida maxsus ibodat yoki duo yo‘q!
Shariatning hurmati barcha narsadan ustun turadi. Muharram oyi va Ashuro kuniga doir yuqoridagi 2 ta tavsiyani (nafl ro‘zasi va ahli oilasiga kengchilik qilish) qamrab olsak kifoya. 10 yoki 100 rakat namoz o‘qish, har rakatda 10 marta Ixlos surasini o‘qish, ko‘zga surma qo‘yish kerak ekan, degan gaplar yo‘q va bularning barchasi bid'at-xurofotlardir.
Muharram oyining 10-kuni bu yil milodiy hisobda 28-iyulga to‘g‘ri kelmoqda.
Kanalga ulanish: @Azon_Diyonat
