СЕНГА КЎП САЛОМЛАР ЙЎЛЛАДИМ ЭЙ, ДЎСТ...

Сенга кўп саломлар йўлладим эй дўст,
Ўртада зор қақшаб саволлар қолди.
Соғинч деган дардни ётдим қучоқлаб,
Нигоҳлар эрта-кеч кутишдан толди.

Умр уммонида оқаверар вақт,
Кечаги япроқлар хазондир бугун.
Кимнинг толейида ёниб ётар бахт,
Кимнинг юрагида армонлар тугун.

Дийдор ғанимат деб, ашъорлар битдим,
Сен минг йил нарига суриласан жим.
Кўнгилга гумонлар йўллаган эй, жон,
Боғларингга ёлғон билан кирди ким?

Каломларим йиғлаб қайтди ўзимга,
Тошлигинг-ку, дилга исёнлар солди.
Неки керак, адо этдим-у, фақат
Оёғингга тоғдай қулашим қолди.