Alisher Eshbekov

Nostalgik podkast bo'libdi. Men u yerda aytilgan ko'p narsalar masalan chet elga chiqish uchun Ovir, bankda dollar maydalash, Toshkentdagi propiska masalalarida to'g'ridan-to'g'ri aziyat chekmagan bo'lsam ham, shularni eshitib katta bo'lganman. O'rta maktabdagi majburiy metallom yoki makalatura yig'ib olib kelganlarimiz esimga tushib ketdi 😂 Shahardan shaharga o'tgandagi harbiy postlar, DVD disklar va h.k.

Suhbatda 2016-yildan keyin hammasi yaxshi bo'lib ketdi degan xabar bo'lsa ham, ko'p gaplari rad etib bo'lmas darajada to'g'ri.

Vauv, oʻta chuqur. Yozib boʻlganimdan keyin toʻgʻri yozganimni tekshirish uchun manbaalarni qarasam. Boshqacharoq aytilishi ham bor ekan.

Yaxshi gap bilan ilon inidan chiqar,
Yomon gap bilan musulmon dinidan.

©Haqiqatdan Dono Xalqimiz

Yaxshi gap bilan ilon inidan chiqadi,
Yomon gap bilan pichoq qinidan.

©Dono xalqimiz

Buni ham ulashib ketay. Oʻtkan safar boʻlgan voqea.

Oldimda ikkita dasturchi gaplashyapti.

A: "Nega siqilib o'tiribsiz?"
B: "Yo'g'ey. Nega siqilishim kerak ekan? O'zi usiz ham hayot qisqa bo'lsa!"
A: "Ikki soatdan keyin yozgan kodingizda bug (xatolik) chiqqanda ham shu gap esizda tursin)"

Bularni o'zini falsafasi bor. Vayblari ham o'ziga xos 😂

Bugun hayotimdagi eng qiyin muloqot bo'ldi. Men tabiatan o'zimni ambivert deb bilaman. Mo'tadil odam. Ya'ni introvert va extrovert ko'prigining o'rtasida turaman. Tajribalarimdan kelib chiqib ayta olamanki, odamlar bilan til topishib do'st bo'lib ketishda qiyinchilik ko'rmayman. Faqat vibe check'dan o'tishsa bo'ldi 😁 Demak, do'stlarim sizlarning hammangiz bu testdan o'tkansiz va jinimiz jinimizga to'g'ri keladi (deb o'ylayman).

Sal chalg'ib ketdim. Ha muloqot haqida aytayotgandim. Bugun bitta tanishimni tanishi bilan 1,5 soatlik kichik safarga chiqdim. Tabiiyki uni yaxshi tanimayman. Tashabbusni o'z qo'limga olib gap boshladim. Hech gapimiz qovushmadi. Savol bersam faqat "Ha" yoki "Yo'q" degan javob oldim. Juda kam gapirarkanlar. Lekin qo'shiq qo'yishim bilan pleylistimdan Tohir akam Sodiqov porlab chiqib keldilarku, qorong'u tunimni yoritib. Ana keyin gapimiz kelishishni boshladi. Umumiy yoqtirib eshitadigan qo'shiqlarimiz talaygina ekan. Ha shunday azizlar, musiqa birlashtiradi. Keyin esa asta umumiy mavzularimiz ham yuzaga chiqa boshladi.

O'zim uchun kichik taftish (self-check) bo'ldi. Dasturchilar qurshovida vaqt o'tkazib, gapga solib tanishish ko'nikmalarim zanglab qolibdida deb aybni ularga to'nkab qo'ya qoldim :) Bunga yechim anchadan beri gaplashmagan odamlarim gaplashish bo'lsa kerak. Agar siz anchadan beri suhbat qilmagan do'stlarim qatorida bo'lsangiz, menga yozing.

Bitta fikr keldi. Men oʻzim qiziqib qolgan nisbatan murakkabroq mavzularni aqlim yetganicha osonroq qilib tushuntirib postlar yozaman. Shunaqa qilsam, umid qilamanki yozuvlarimga doimiylik qaytadi.

Kunlardan bir kun suhbat qilib o'tirvudik. Gap esa qanaqa qilib 1 lar hamda 0 lar bizga butun boshli rasmni bitta telefondan ikkinchisiga oʻtkazishga yordam berishi haqida ketib qoldi. Toʻgʻrisida axir qanaqa qilib Valini 6 yoshlik yarim sut tishi tushib irshayib kuchugi bilan o'ynayotgan rasmi 1 bilan 0 boʻlib meni telefonimda paydo boʻlib qoladi? Bu esa bizga maʼlum va mashhur boʻlgan Bluetooth'ni qanday ishlaydi ekan degan savol ila jumboqlar mamlakatiga jo'natvordi. Bu haqida oʻrganib oʻzim uchun tushunib oldim lekin birovga tushuntira oladigan darajaga chiqish uchun esa yozishim kerak.

Hammani lol qoldirib lekin allaqachon odatiy holga aylanib qolgan texnologik moʻjizalar haqida shu kunlarda oʻqiyotgandim, shu fikr ketmayman deb qattiq quchoqlab oldi.

Bir necha soatdan beri svet yo'q. Anchadan beri birinchi marta shunaqa zerikdim. Sabrsiz bo'lib ketdim. Ichlarim siqilib ketdi. Lekin shu bahonada bir ikkita o'zimga qiziq fikrlarni note qilib qo'ydim. Yozaman erta indin.

Bitta suhbatdan parcha.

"Men shu binoyimni ijaraga beraman deb rosa yelib yugurdim. Hech o'xshamaydida. Unisi keladi falon so'mdan bering deydi bunisi keladi falon qulaylikni qo'shib bering va h.k. O'zi bozor narxidan pastroq aytayapman ijara pulini.

Shu bir yo'li chiqib qolib, Korzinka'dagilar bilan gaplashib, joyni ko'rsatdim. Binoyimni bir qismini ularga ijaraga beradigan bo'ldim. Korzinka bilan shartnoma tuzishim zahotiyoq, eshigimni tagida navbat paydo bo'ldi. Binoyimdan qolgan qismini ijaraga olish uchun tadbirkorlar kelishni boshladi."

Avallari, Zafar aka har bir filialni ochishdan oldin o'sha bino joylashgan joydagi trassadan bir kunini bag'ishlab, kuniga o'rtacha nechta mashina o'tishini hisoblagandan keyin bunaqa hisob-kitob qilgan odam keldimi qolgan bizneslar ham demak bu yerda bizga ham non topiladi deb o'ylashsa kerak.

Yuqoridagi postda juda qiziq kuzatuv bo'libdi chunki haqiqatdan Korzinka'dan oldin Makro kelganda, bizda hali Yandex ham yo'q edi. Balki shunchaki tasodifdir. Lekin tepada yozganim suhbatdan parcha esimga tushib ketib, balki rostdan ham Korzinka qanaqadir baraka benchmarki bo'lib qolgandir deb o'ylab qoldim.

+

Universitet kerak (mi) ?!

Ha, kerak. Menimcha.

Talabalik bosqichini bosib o’tdim shunga ba’zi fikrlarim va kuzatuvlarimni aytaman deb oldinroq yozgan edim. Boshlanishiga shularni oʻqib turing. Yana yozaman universitet bitiklari haqida.

Bill Geyts bilan Mark Zukerbergni chekkaga surib turing. Atrofingizda o'qimasdan ham yaxshi yashayotgan Toshmat bilan Eshmatni ham qo'yib turing. Statistikaga boqing. Universitet darajangiz o'rtacha hisobda yuqoriroq daromad va inqirozli davrlarda ham sizda nisbatan pastroq ishsizlik darajasi kuzatilishini tasdiqlaydi.

"Zamonaviy kasb egalari uchun diplom shart emas." Qisman qo'shilaman. Lekin bu yerda ko'zdan qochirmaslik kerak bo'lgan nyuanslari bor. Aytaylik, siz kelajakda Google'da ishlamoqchisiz, katta ehtimol bilan siz Google'ning chet eldagi ofislaridan birida ishlashingiz kerak ya'ni immigratsiya. Rivojlangan mamlakatlarda maxsus talant vizalari mavjud shu turdagi kuchli zamonaviy kasb egalari uchun lekin viza jarayonidagi muhim omillardan biri bu oliy ta'lim darajangizni bor yoki yo'q ekanligi. Adashmayotgan bo'lsam. Ya'ni xattoki o'zingiz xohlagan diplomsiz yo'nalishda ham cho'qqiga chiqishda diplom yo'qligi pand berishi mumkin.

Endi 4 yil umringizni oliy ta'limga bag'ishlashning amaliy foydalariga to'xtalsam. O'zbekiston sharoitida, o'qishga kirmagan taqdirda o'g'il bolalar odatda ishlashi talab qilinsa, qiz bolalar turmush chiqishi kutiladi. Agar yetarlicha harakat qilib o'qishga kirsangiz, xoh chet elda xoh O'zbekistonda ijtimoiy bosimlarsiz va oilangiz moliyaviy yordam olishingiz uyat hisoblanmagan 4 yillik bonus davr qo'ingizga tutqaziladi

Men hali ijtimoiylashish, odamlar bilan til topisha olish, shaxsiy moliyani boshqarish, doimiylik (consistency) va boshqa universitetda o’qish bilan keladigan yoqimli bonuslar haqida gapirmadim. Nega yoqimli bonuslar ? Bular hayot yo’lini tekis asfaltli yoki o’nqir-cho’nqir yamali bo’lishini belgilaydigan ko’nikmalar va aynan universitet paytida mustahkam ildiz yoyadi.

Bir million odamdan 4 tasini koʻrib menda ham yuz foiz shunday boʻladi deyish xato boʻladi. Lekin umid soʻndirish kerak ham emas. Bu endi boshqa mavzu.

@eshbekovalisher

Oxirgi 2-3 kun yomgʻir shoshilmay yogʻdi. Men oʻtadigan katta chorraha svetoforlari ishlamadi. Bugun esa yashil chiroq yonmayapti u shunchaki porlayapti xuddi oʻtkan yonmagan kunlarining badalini to'layotgandek.

Oʻzi tongning eng yaxshi xususiyatlaridan biri bu toza havo. Xatto Toshkonning changli havosi ham tongda kislorodga boy toza havo bilan "smena" almashishsa kerak.

Men uyga ketayapman. Yaqinlarimni koʻrgani va baʼzi ishlarni bitirgani.

Yoʻlda 3-qavatdagi shaffof oynadan sport zalda kimdir vazn olishga yana allakim vazn yoʻqotishga harakat qilayotgani ko'zga tashlandi. Hammani dardi har xil lekin manzili bir xil.

Metroga chiqdim. Odam men o'ylaganchilik gavjum emas. Bu ham erta tongning bonuslaridan boʻlsa kerak.

Metroda bir bola yonimda uxlab ketayapti. Oʻzini uxlaganga solib olmagani aniq. Boshi bir oʻngga men tomonga, bir chap tarafga chayqalayapti. Birinchi oʻtgan hayol "Talaba boʻlsa kerak. Kunduzi ishlab, kechasi qayerdadir ishlasa kerak. Shunga uyqusirab yurgandir. Omadingni bersin yigit, bos gazini!" boʻldi. Sal oʻtib bitta tanishim esimga tushib "Balki bu bola shunchaki kechasi bilan PUBG oʻynab chiqqandir" degan hayol oʻtdi. Soddamanda 😌. Bir qarashdayoq hammani oʻzimga o'xshataman keyin pand yeb yuraman.

Postni yo'lda yurib kelayotganda miyada qoraladim. Keyin telefonga tushirdim. Yozishdan oldin yozdim. Yozish haqidagi kitobning 100 tadan bitta o'gitini bajarganimdan, nazariyani amaliyotga o'tkazolganimdan xursandman.

Dedlaynlarim yaqin. Inglizlar ham dono xalq bejizga bu so'z "dead line" emas, bu chiziqqa yetganda ham jismonan ham ma'nan yo o'lasan yo o'lish arafasida bo'lasan. Loyihalarni yakuniy test qilish bilan bandman. Hozir muammolar tuzalgunicha, nima qilishni bilmay chala postni oxirgacha yetkazib qo'yayapman.

Guliston, O'zbekiston
08 Noyabr, 2024
Muhr, Imzo

@eshbekovalisher