– Сен – баҳор,
Мен – дарахт.
Лаҳзалар рангин,
Ўрнингни бермайсан ўзга фаслга.
Сен мудом яшилсан, мен мудом яшил,
Биз шундай яралдик аслида.

– Мен – Одам,
Сен – Ҳавво!
Олтин қовурғам,
Биз мудом яшилмиз қиёмат қадар.
Боғлар яратамиз нафасимиздан,
Бир мева ақлингни олмаса агар.

– Пешонангга сурат ишлади ғамлар...
Умримиздан юриб лаҳзалар ўтди.
Оғриқни сездингми чап қовурғангда –
Мен мева емасдан дунёдан ўтдим.

Башорат ОТАЖОНОВА

https://t.me/dilgamaktublar