Дилга мактублар!..

Энди шеър ёзмайман унга бағишлаб,
Энди хаёлини ўйлаб йиғлайман.
Ана, қорли кеча — оппоқ фаришта
Бўсалар олмоқда азиз манглайдан.

Энди мактублар ҳам битмайман — тамом!
Занжирбанд қиламан телба қайғуни.
Ана, қорли кеча — тўзғиган шайтон
Олиб кетмоқдадир қучоқлаб уни.

Наҳот, қачонлардир чиқади қуёш,
Нурга йўғрилади бу совуқ дунё?
Энди бу ҳаётим кетгунча бардош,
Энди бу ҳаётим меники танҳо...

Усмон Азим

https://telegram.me/dilgamaktublar

ЭСКИ ГАП

Муҳаббат нимадир?
Чиндан эски гап -
Ер эсанг,
Ой каби бир йўлдошингдир.
Сочинг оқарса ҳам , йиллар оралаб
Киприкда тўкилмай турган ёшингдир.

Нодира Афоқ

https://telegram.me/dilgamaktublar

АЖР

Ёмон тушлар кўрсанг,
Босинқирасанг,
“Алҳамду”ни айтгил,
Қочади шайтон.
Фалакдан нисбангни
Ўйлаб қарасанг,
Сен ҳам ҳазилакам
Эмассан, Инсон!!!

Сени яратганди
Аслида Аллоҳ,
Бош бўласан, дея
Фаришталарга.
Лекин тинч юрмадинг
Аршда ҳам, э воҳ,
Аралашиб қолдинг
Ҳар хил ишларга.

Аллоҳнинг қошида
Бўлсанг ҳам иқрор.
Ажрингни гоҳ узиб,
Узолмагансан.
Кечирмайин деса
Ибодатинг бор,
Кечирайин, деса
Тузалмагансан.

Абдулла ОРИПОВ

https://telegram.me/dilgamaktublar

Хайр энди,
Менсиз яшайди улар.
Нима бўпти, майли,
битта шоир кам.
Энди ҳаддан зиёд бахтли бўлишар,
бахт дегани ҳатто бўлмаганда ҳам.

“Хайр”, дедим сўнг бор қуруқдан қуруқ.
Лутфан асо тутди,
Танимадим – ким.
Деди: “Менинг сендек ёронларим йўқ,
Йўқдир менинг сендай бирор душманим...”

Эшик ғирчиллади.
Эснади кучук.
Елкамга йиқилди юмшоқ панжалар.
“Энди ортингга қайт,
деёлмайман, йўқ.
Мен кўриб турибман,
хайр, азизим, хайр!”

Ва қайтди ортига,
эшик ҳам қайтди.
Тун эди. Борардим туннинг қаърига.
Негадир жуда ҳам осгим келарди
ўзимни юлдузнинг ришталарига...

Асқар Маҳкам


https://telegram.me/dilgamaktublar

“МАЙДАКАШ” ШОИРНИНГ ШЕЪРИ

Тўлиб келдим уйга бу оқшом,
Туфлаб кўрдим – қип-қизарди қор.
Болам ҳайрон, аёлим вайрон:
“Айтинг, ахир не дардингиз бор?

Мана, сизда фаровон ҳаёт,
Обрўлисиз, уй-жойингиз бор.
Кимлардир зўр шоир, деб билар,
Нима сизни ўртади бекор?”

Сал паришон боқиб уларга,
Бир зум тургач тилим эшилди:
Мен ҳаёти чаманзор шоир,
Ўзи недан кўксим тешилди..?

Мен шоирмас, даласидаги
Ҳосили хор бўлган бир жонман.
Пайкалдаги тарвуз, пиёзин
Сотолмасдан куйган деҳқонман.

Мен шоирмас, Ўрисга кетиб,
Томдан қулаб қайтган майитман.
Уйидаги етимчаларнинг
Фарёдига жўр бўлган итман.

Мен шоирмас, илм йўлида
Тер тўккан-у иши унмаган.
Бўйинбоғли ўлаксахўрга
Йиғиб қўйган зари бўлмаган.

Мен шоирмас, ўз бойлигига
Қўли етмай, ҳавас этгувчи.
Газга навбат кутган шофёрдай
Тушунмасдан гангиб ўтгувчи.

Мен шоирмас, бир нотовонман,
Кўринмас бир занжирда қўлим.
Ичим тўла савол бўлса ҳам,
Хушомаддан бўшамас тилим.

...Рўпарамда пайдо бўласиз,
Сўзларингиз вазмин, сермаъно.
Бир лаҳзада кимлигим айтиб,
Беражаксиз танбеҳлар – сипо:

“Майда гаплар сизга ярашмас,
Келажакдан, ҳикматдан сўйланг!
Ахир, оддий, майда одамлар
Тушунмайди шеърингиз... ўйланг...”

Эй, тиллари бозингар элдош,
Аврамагин, бунда турмайман.
Сен алқаган шу қутлуғ юртни
Мен ҳам унча ёмон кўрмайман.

Майда гапли бўлсам ҳам, гарчи,
Дуо учун кимга қўл тутдим?
Масжиддаги пиримдан эмас,
Тезак терган бевадан кутдим.

Бир замонлар халқим пахтакор,
Ватан эса пахтазор эди.
Нени орзу қилдим – етишдим,
Чиндан иқбол кулсин-да, энди!

Адашмагин: бу азим юртнинг
Тоғ-у дашти, сойи бизники!
Бир-биридан айирмай севдим –
Камбағал-у бойи бизники!

Барчамизга тегишдир бу эл,
Ҳаммамизга тенгдир бу ҳаёт.
Суҳбатимиз англаб турибди
Ҳамма тилни тушунгувчи Зот.

Туҳмат қилмам – қўрққум Худодан!
Ҳар бандага бир хил шартлари.
Нима қилай – мени майдалар
Катта халқнинг майда дардлари.

Шодмонқул САЛОМ

https://t.me/dilgamaktublar

***
Бир шамол бор эди ичимда
У билан қувлашиб ўсдим ман.
Шуълазон тунларнинг ичинда
Юзимни ой билан тўсдим ман.

Шодликни бўлишдик – кўпайди,
Ғурбатни бўлишдик – камайди,
Зарофат – ридосин ямайдир,
Зуҳҳодга кун борму дастимдан?

Кўзимда чатнатиб шарорим,
Ҳувайдо, ёдина борорим,
Қарорим зарифдур, қарори
Ўргулур бор бўю бастимдан.

Юз жафо, минг сафо – қадимлик,
Зарурмиш кўнглима надимлик.
Бир парча муҳаррар хатимдек
Фош этур нигоҳу ростимдан.

Оқ десам умримнинг буёғин,
Сочимга ранг сочмиш бўёғи.
Ишқ деган доғули бу ёғий
Қай маҳал тин олур қасдимдан?

Бир шамол бор эди ичимда,
У билан қувнашиб ўсдим ман.
Сен уни ўлдирган кечада
Қиқирлаб кулсайдим устимдан.

Қиқирлаб кулсайдим устимдан...

Маҳфуза Имомова

https://t.me/dilgamaktublar

Бир юпанч бор эди айтарли,
Бир ишонч бор эди идраган.
Битта йўл бор эди қайтарли,
Битта гул бор эди қайтмаган.

Оппоқ қор ёққанда гупуриб,
Оҳ-зорлар оғдирди эсимдан.
Оқшомга юз бурдим тонг туриб,
Оҳ, Соғинч, сен кимнинг исмисан?..

Бу қисқа кўринган кунмиди,
Бу қистаб жон олар тундир-а?
Май тусаб турибман тўлдиру,
Ҳа, истаб юрибман ўлдира...

Ютганда энг сўнгги ютумни,
Чиққанда оғринчнинг измидан,
Айтқани, унутган отимни,
Айт, соғинч, сен кимнинг исмисан?..

Нажмиддин Эрматов

https://t.me/dilgamaktublar

РАМАЗОН

Фалакнинг буржида ой кўринди, ой,
Ҳидоятга чорлаб янгради азон.
Оламга, дилларга келди, ҳойнаҳой,
Ойларнинг султони моҳи рамазон.

Саноқли умрнинг энг тотли дами,
Саноқли кунларда тутамиз рўза.
Истиғфор айтамиз, юрак малҳами,
Дуолар қиламиз шабнамдай тоза.

Бир ойким, мисоли тип-тиниқ чашма.
Покланмоқ истайди ошуфта кўнгул.
Руҳимиз тип-тиниқ илинжга ташна,
Ювилиб кетсайди гуноҳлар буткул.

Ғайрат Мажид

https://t.me/dilgamaktublar

Қирқинчи довонга термулиб,
Ўйлайман: тўрвада нима бор?
Чопқиллаб чиқишга ғайрат йўқ,
Эмаклаб боришга қўймас ор.

Қисматим - тўрт дона суратдир,
Оқ-қора, оқ-қора, оқ-қора.
Товонда хиргойи қиламан,
Бошимда чаламан ноғора...

Қўқондан то Тошканга қадар
Ушоқдек сочилган умрим бор.
Кўнгилнинг энг чуқур ерида,
Чиройли бир соқов қумри бор...

Одамга ўхшайман баъзида -
Одамга бўламан интизор.
Кўз очсам - дунё бор, кўз юмсам -
Уйқу бермайдиган бир қиз бор...

Тупроқдек самимий ҳабиб йўқ,
Булутдек омонат дўстлар бор.
Тишлагим келади бармоғим -
Кўзлар бор, кўзлар бор, кўзлар бор...

Отам бор, онам бор - бутунман,
Бағримда бир бахтли аёл бор.
Яхшиям, яхшиям, яхшиям -
Хаёл бор, хаёл бор, хаёл бор...

Қирқинчи довонга термулиб,
Айтаман: дунёда нима бор?
Бахтли кимсаларни ёнида
Одамдек яшашга қўймас ор...

Шуҳрат  ОРИФ

https://t.me/dilgamaktublar

Ёмғир.
Бекат.
Эркакнинг эгнида ёмғирпўш.
Аёлнинг кўйлаги баданига ёпишган.

(Олтмишинчи автобус тўхтаб ўтади).

"Совуқ қотди,— ўйлайди эркак,—
Ёмғирпўшни елкасига ташласам
Хафа бўлмасмикин?"

(Олтмишинчи автобус тўхтаб ўтади).

"Чиройли экан,— ўйлайди эркак,—
Ёши ҳам ўттиздан ошмаган.
Қани эди, шундай хотиним бўлса..."

(Олтмишинчи автобус тўхтаб ўтади).

"Балки у тақдиримдир,—ўйлайди эркак,—
Аммо ёмғирпўштни
елкасига ташласам,
отиб юбормасмикан?
Барибир аёл-да__
Чиройли бўлса ҳам..."

(Олтмишинчи автобус олиб кетади аёлни).

Уф тортади эркак.
(Уйида
ивиган кийимларини
яна ўзи
— хўрсиниб — ечади аёл).


Усмон Азим

https://t.me/dilgamaktublar

САККИЗИНЧИ МАРТГА ЯРИМ ҲАЗИЛ

Аёлга тош отиш мумкинми, деса,
Эркаклар баравар чайқайдилар бош.
Аёлга тош отинг қурбингиз етса,
Фақат... қимматбаҳо бўлсин ўша тош!

Иқбол МИРЗО

https://t.me/dilgamaktublar

Муқаддас аёл

Ошиқларинг пойингга гул отиб ҳам бўлди,
Хилватларда лабингдан бол тотиб ҳам бўлди,
Ва бу ҳақда кимларгадир сотиб ҳам бўлди,
Сен бари бир муқаддассан,
Муқаддас аёл!

«Аввал: «Кел-эй, қучоғимга тўл, балқ», дедилар,
Унамадинг, аёл ўзи терс «халқ», дедилар.
Ичолмагач юз ўгириб шўр, талх, дедилар,
Сен бари бир муқаддассан,
Муқаддас Аёл!

Сен дарёсан, ўпганини қирғоқ яширар,
Жуфтим бўл, — деб чопганини ҳар тоқ яширар,
Жаннатим, — деб қувонмасдан қумлоқ яширар,
Сен бари бир муқаддассан,
Муқаддас Аёл!

Асли бу бор эрмакларнинг борар ери Сен,
Росту ёлғон эртакларнинг борар ери Сен,
Асов отдай эркакларнинг борар ери Сен,
Сен бари бир муқаддассан,
Муқаддас Аёл!

Чорлашганда сен келсанг, гоҳ бекор келсанг-да,
Маст даврага бир сарин ел, бир тор келсанг-да,
Хор келсанг-да, номардларга гоҳ хор келсанг-да,
Сен бари бир муқаддассан,
Муқаддас Аёл!

Қимтинасан, астагина кўтарасан бош,
Минг йилликдир кўзингдаги жовдираган ёш,
Гуноҳкорлар мингу битта Сенга тегар тош,
Сен бари бир муқаддассан,
Муқаддас Аёл!

Ҳарир, хушбўй баданингда тошлар изи бор,
Кўкрагингда эгилган не бошлар изи бор,
Қуёш изи, куйдирган қуёшлар изи бор,
Сен бари бир муқаддассан,
Муқаддас Аёл!

Ҳалима ХУДОЙБЕРДИЕВА

https://t.me/dilgamaktublar

Масофа

Ўн йилдан ўтишга 10 дақиқа бер.
Усмон Азим сатри

47 ёшингда умрингга кириб,
Ширин оромингни бузмадимми, айт?
Умринг йўлларида телбадек юриб,
Кўнглинг ришталарин узмадимми, айт?

Биллурдек юрагинг, ҳаёлларингга,
Мендан бир доғ қўниб қолмадимикан?
Ҳар ердан қувилган бу телба севгим,
Ҳаётингга оғу солмадимикан?

Ўйнаб кўзмунчоғин йўқотган гўдак,
Эсласам юрагим оғрийди сим-сим.
Болалик чоғимда йўқотиб қўйиб –
Эй, ўттиз ёшимда топган қувончим.

Югурдим ва лекин етолмадим ҳеч,
Гарчи умр ўтиб бормоқда елдек.
Кўзлари жовдираб йиғлаб турибди,
Ўртада масофа ...
17 йиллик.

Агар шу масофа айирса бизни,
Кўксим дарвозасин муштинг билан ур.
Азизим, мен сенга етмоғим учун,
47 ёшингдан ўтмай кутиб тур!

Гулжамол Асқарова

https://t.me/dilgamaktublar

#табрик

Бугун ажойиб шоира, ўз сўзига, тоза қалбига эга Гулжамол Асқарова таваллуд топган кун. Эл суйган шоира Гулжамол Асқаровани чин қалбдан табриклаймиз. Узоқ ва мазмунли умр, ижодларига ва ризқига барака тилаймиз!
Гулжамол опа тоза, баланд ва теран ёзади. Пичирлаб ўқисанг ҳам, бутун борлиққа таралаётгандек, бутун дунё кўнгилга айланиб бораётган бўлаверади...
Доимо сўзингиз ва юзингиз ёруғ бўлсин,
Ҳурмат билан укангиз Илҳом.

Миннатдорлик

Миннатдорман сиздан йилларим,
Сизда туйдим бахтнинг таъмини.
Мен дунёнинг йўлакларига,
Ёқиб қўйдим қирқта шамимни.

Кўп йўл юрдим ҳаловат излаб,
Севги туйдим, тотли, оғриқли.
Шундан буён қалбим ичида,
Яшаётир дилбар ёруғлик.

Раҳмат дейман ҳаммаси учун,
Яшадимку улуғвор, сокин.
Биламанки, бу азиз юртда,
Топталмагай қимматим, хоким.

Шундоқ экан ёзғирмоқ нечун,
Нечун чекмоқ ҳасрат, ғамларни.
Айтарларки, қаро тунларда,
Эслаб яша  ёруғ дамларни.

Умид, Севги, Меҳр бор экан,
Қайтар ахир гулламоқ фасли.
Ҳаёт – жами ғамлар устидан,
Кулиб яшаш дегани асли!

Гулжамол Асқарова шеъри

https://t.me/dilgamaktublar

* * *

Шаҳарим,
Ҳали ҳам ҳаётинг тўкисми?
Бутунми, кирмаган қўрғоним.
Сенга ҳам аёнми, қайдадир,
Тентираб, саросар юрганим...

Шаҳарим,
Бу йўллар шунчаки алдади,
Шунчаки умримни ўкситдим.
Сен бахтли яшадинг. Мен эса-
Кўзимда нилуфар ўстирдим.

Шаҳарим, то тонгки уйғонсам,
Ўн йилни ўчирсам хотирдан.
Ям-яшил ҳавони сипқориб,
Ёнингга борсайдим, хотиржам!

Шаҳарим,
афсуски йўллар берк,
Кўнгилни кенгликлар қоплаган.
Биламан, олифта умринга,
Ҳеч қачон чанг ҳаво ёқмаган.

Майлида, омон бўл, тетик бўл,
Бахтимга қирларим бор бўлсин.
Бахтингга соғ бўлсин, Шаҳаринг,
Шаҳарликларинг ҳам соғ бўлсин!

Шаҳарим...

Кумуш ЎСАРОВА

https://t.me/dilgamaktublar

МАРТГА ҚАРАБ БОРЯПМИЗ

Мартга қараб боряпмиз, моҳим,
Қорлар қандай эрияпти, боқ.
Ортилгандек менинг гуноҳим,
Мунғаяди бунча Бойсунтоғ...

Мартга қараб боряпмиз, гулим,
Ниҳоя бор музлашимизга.
Бойчечаклар ер остида жим,
Интиқ ётар излашимизга.

Биз бахтиёр эдик барибир,
Энтикаман эслаган оним.
Баҳор келар – бағри тўла сир,
Мартга қараб боряпмиз, жоним.

Нега ҳануз нигоҳингда муз,
Бу фаслдан ким бездирди, ким?
Ҳамма мартга боряпти-ю, биз
Ортга қараб боряпмиз, жоним...

Ким бахтли, деб сўрама, асли
Бахтни кутиб ётмаган бахтли.
Қақшатувчи қаҳратон фасли
Сира совуқ қотмаган бахтли.

Ишқ изҳори битган хатини
Ёр қўлига тутганлар бахтли.
Музламаган муҳаббатини
Мартга олиб ўтганлар бахтли!

Жўрабек Рамазон

https://t.me/dilgamaktublar