Hurmatli do'stlar!Ayrim telegram kanallarda
"Yoshlar qurilish invest" MCHJ buyurtmasi asosida kapital ta'mirlangan Jizzaxdagi bino masalasi muhokama bo'layotganiga ko'zim tushdi.
Mazkur vazifada ish boshlaganimga 3 oy bo'ldi. Shu qisqa vaqt ichida, yuqoridagi masalaning ichiga kirganim sari ayrim bahsli holatlar meni shoshmasdan, hissiyotlarga berilmasdan, og'ir-vazminlik bilan qaror qilishimga undadi. Sababi 2 yil oldin qurilishi boshlangan, 1 yil oldin foydalanishga topshirilgan va aynan bugun muammolari ko'tarilayotgan Jizzax viloyati "Yoshlar innovatsion markazi" binosi masalasida savollar juda ko'p.
Birinchi navbatda shu xalq farzandi sifatida, qolaversa, soliqlaridan shakllangan mablag'larni maqsadli, adolatli sarflanishiga mas'ul vazifani egallab turgan inson sifatida o'z fikrimni bildirmoqchiman.
Men quruvchining
ish haqini olishi tarafdoriman. Faqat
haqiqiy, halol ish haqini. Shu bilan bir qatorda
byudjet mablag'ini ham maqsadli ajratilishiga birinchidan qonun oldida, ikkinchidan vijdon oldida javob bera olishim kerak deb hisoblayman.
Bizning tashkilot qurilish tashkiloti emas, Yoshlar tashkiloti. Shuning uchun ham qurilish masalalari qurilish sohasining mutaxassislaridan iborat bo'lgan, 4 yil oldin tashkil etilgan "Yoshlar qurilish invest" MCHJ tomonidan tartibga solinadi. Nizomga ko'ra, "Yoshlar qurilish invest" MCHJ buyurtmachi bo'lgan har bir obyekt uchun ajratiladigan mablag'larning
3% ini, har bir konsultatsiyasi uchun
0.5 %ini oladi. Bu katta mablag' va mas'uliyat degani. Demak, bundan ko'rinib turibdiki, bu tashkilot
"shunchaki bir vositachi" emas, balki, o'zi buyurtmachi hisoblangan har bir qurilish obyektining qurilishidan to foydalanishga topshirilguniga qadar bo'ladigan
moliyaviy, tashkiliy va huquqiy masalalarini yechishga mas'ul tashkilot. Shu sababli Toshkent shahar tumanlararo iqtisodiy sudi o'z qarorida Yoshlar ittifoqini emas, aynan
"Yoshlar qurilish invest" MCHJ ni javobgar sifatida ko'rsatgan.Yuqoridagilardan kelib chiqib, biz bu masalani
moliya, qurilish va zarurat tug'ilgan taqdirda, albatta huquqni muhofaza qiluvchi organlar muhokamasiga kiritmoqchimiz. Sud-huquq organlari tomonidan haqiqiy holat aniqlanganidan va o'rnatilgan tartibda xulosa berilganidan so'ng, masala o'z qonuniy yechimini topadi. Bizni hech qaysi tashkilotdan yoki insondan gumonimiz yo'q.
GUMON IYMONDAN AYIRADI. Do'stlar, agar siz haqiqatdan ham byudjet mablag'lari
maqsadli sarflanishi va muammoning haqiqiy
sababchilari aniqlanib, quruvchi o'z haqini olishi hamda eng asosiysi,
adolat qaror topishini istasangiz, biror post yozishdan yoki izoh bildirishdan oldin
har ikki tomonni ham eshiting. Chunki bir tomonni eshitib, bildirilayotgan fikrlar doim ham xolis fikr bo'lavermaydi. Balki masalani ijtimoiy tarmoqlarda "shov-shuv"ga aylantirib, "to's-to'polon"da jarayonni hisob-kitobsiz "sun'iy tezlashtirishdan" va shoshilinch qaror qabul qilinishidan "manfaatdor"lar ham bordir.
Bunisi bizga qorong'u. Haqiqiy holatga aniqlik kiritilguniga qadar,
shaxsan o'zim bu masala bo'yicha istalgan inson bilan avvalo yuzma-yuz yoki telegram orqali ham muloqot qilishga
tayyorman.
@ajumaboyev
