O‘zbekiston texnik jihatdan tartibga solish agentligi direktori Akmal Jumanazarov Slovakiyaning O‘zbekistondagi elchisi Viktor Boretskiy bilan uchrashdi.

Konstruktiv ruhda o‘tgan mazkur uchrashuvda standartlashtirish, metrologiya va sinov sohalarida hamkorlik ko‘lamini kengaytirish, malakali kadrlar tayyorlash, grantlar va texnik ko‘makni jalb etish, Slovakiya standartlar, metrologiya va sinovlar idorasi (UNMS SR) va O‘zbekiston texnik jihatdan tartibga solish agentligi o‘rtasida Anglashuv memorandumini imzolash choralarini jadallashtirish masalalari muhokama qilindi.

Yevropa Ittifoqining TAIEX va TWINNING dasturlari doirasida xodimlarning bilim va ko‘nikmalarini oshirish, UNMS SR va Slovakiya milliy metrologiya instituti (SMU) bilan hamkorlikni yangi bosqichga olib chiqish, hamkorlikda Kvant termodinamik harorat laboratoriyasini tashkil qilish masalalariga e’tibor qaratildi.

Uchrashuv yakunlari bo‘yicha Elchi Viktor Boretskiy Slovakiya va O‘zbekiston o‘rtasida mustahkam do‘stlik va hamkorlik aloqalari o‘rnatishga, strategik sheriklik darajasini ko‘tarishga va barcha sohalarda aloqalarni kengaytirishga tayyor ekanliklarini bildirdi.