O‘zbekiston texnik jihatdan tartibga solish agentligi direktori Akmal Jumanazarov Yaponiyaning O‘zbekistondagi Favqulodda va Muxtor elchisi Takashi Xatori bilan uchrashdi.

O‘zbekiston Respublikasi Tashqi ishlar vazirligi hamkorligida tashkil etilgan uchrashuvda texnik tartibga solish, standartlashtirish, metrologiya va muvofilikni baholash sohasida hamkorlik munosabatlarning hozirgi holati va istiqbollari, hamkorlik ko‘lamlarini kengaytirish, malakali kadrlar tayyorlash, grantlar va texnik ko‘makni jalb etish masalalari muhokama qilindi.

Muloqot davomida mahsulotlar sinovi va metrologiya sohasida zarur bo‘lgan loyihalar yuzasidan taqdimot qilindi va mavjud laboratoriyalar faoliyati bilan tanishtirildi.

Yaponiya xalqaro hamkorlik agentligi (JICA), Yaponiya Sanoat standartlari qo‘mitasi (JIS) bilan hamkorlikni yangi bosqichga olib chiqish, tomonlarning ulkan salohiyatidan to‘liq foydalanish, yangi istiqbolli loyihalarni kengaytirish va yanada chuqurlashtirishga alohida e’tibor qaratildi. Shuningdek, malakali kadrlar tayyorlashda qo‘shma loyihalarni yo‘lga qo‘yish yuzasidan qator takliflar ilgari surildi.

O‘zbekiston milliy metrologiya instituti faoliyati va etalonlarni rivojlantirishga qaratilgan laboratoriyalar texnik bazasi, ulardan foydalanish bo‘yicha yaratilgan infratuzilma bilan yaqindan tanishtirildi. O‘zbekiston ilmiy-sinov va sifat nazorati markazi laboratoriyalaridagi shart-sharoitlar xalqaro standartlar va me’yoriy talablarga mosligi elchi Takashi Xatori tomonidan yuqori e’tirof etildi.

Uchrashuv yakunlari bo‘yicha tomonlar bundan buyon ham O‘zbekiston va Yaponiya o‘rtasida soha yo‘nalishida ikki tomonlama hamkorlikni mustahkamlash uchun barcha sa’y-harakatni ishga solishga tayyor ekanliklarini bildirdi.