Avval xabar berilganidek, Oʻzbekiston texnik jihatdan tartibga solish agentligi direktori Akmal Jumanazarov hamda Turkiya hamkorlik va muvofiqlashtirish agentligi (TİKA)ning Oʻzbekistondagi vakolatxonasi rahbari Ali Riza TEZJAN oʻrtasida uchrashuv oʻtkazilib, SMIIC standartlari boʻyicha Agentlik xodimlari uchun Turkiyada malaka oshirish va oʻquv dasturlari oʻtkazishga kelishilgan edi.

Mazkur kelishuv doirasida joriy yilning 2–6-dekabr kunlari Turkiya hamkorlik va muvofiqlashtirish agentligi (TIKA) hamkorligida Anqara shahrida Agentlik va uning tizim tashkilotlari xodimlari uchun malaka oshirish va oʻquv dasturlari tashkil etilmoqda.

Oʻquv kurslarini olib boruvchi tajribali ustozlar Nuray Talay,  Kardelen Tabaklar, Gözde Özçam, Cansu Şenyürek, Dilşah Damla Görgülü, Özmen Demir, Erdem Başdemirci va Rana Aydınlı tomonidan SMIIC xalqaro standartlari OIC/ SMIIC 1:2019, OIC/SMIIC 2: 2019, OIC/SMIIC 24:2020, OIC/SMIIC 9: 2019, OIC/SMIIC 33:2020, OIC/SMIIC 35:2020 boʻyicha ishtirokchilarda bilim, koʻnikma va malaka shakllantiriladi.

Ishtirokchilar shuning bilan birga Turkiyadagi mahsulotlar sifati va xavfsizligi boʻyicha sinovlarni amalga oshiradigan laboratoriyalar faoliyati bilan yaqindan tanishadi. Malaka oshirish va oʻquv dasturlarini muvaffaqiyatli tamomlagan ishtirokchilar sertifikat bilan taqdirlanadi.