НЕВАРАГА КУНИМ ҚОЛДИМ.

Қариб анча кучдан қолдим.
Оёқ, қўлим ҳорди, толди.
Аллоҳ қувватимни олди.
Неварага куним қолди.

Қизлар учди тараф тараф.
Келар энди эрдан сўраб.
Ўтирмайди менга қараб.
Неварага куним қолди.

“Бор, уйингдан тингин “- дейман.
“Эр хизматин қилгин”- дейман.
“Мени ўйламагин”- дейман.
Неварага куним қолди.

Яхши ҳам уйда қизим бор.
Неварам- бир юлдузим бор.
Мунчоқ кўзли ой юзим бор.
Неварага куним қолди.

Аллоҳдан сўраб олганман.
Исмини ўзим қўйганман.
“Асал,” “новвот” -деб суйганман.
Неварага куним қолди.

Бешигини тебратганман.
Алла айтиб ухлатганман.
Бағримда олиб ётганман.
Неварага куним қолди.

Қўлин ушлаб ёздирганман.
Алифбони ўқитганман.
Сочини тараб, ўрганман.
Неварага куним қолди.

Мана, ўсиб катта бўлди.
Тўтудек бир дастёр бўлди.
Хизматидан кўнглим тўлди.
Неварага куним қолди.

Келин уйга кириб кетар.
Чолим мендан бўлак ётар.
Шу қиз ёнимда, бас, етар!
Неварага куним қолди.

“Тур, белимни ўраб қўйгин!”
“Соатимни бураб қўйгин!”
“Жойнамозим тўшаб қўйгин!”
Неварага куним қолди.

“Пайпоғимни кийғиз, болам”.
“Кўзойнагим топ тез, болам”.
“Мени қўйма ёлғиз, болам”.
Неварага куним қолди.

“Рўмолимни чайиб қўйгин.”
“Кўйлагимни ёйиб қўйгин.”
“Тўшагимни қоқиб қўйгин.”
Неварага куним қолди.

“Махсимни торт, ечиб олай”
“Лимон чой қил, ичиб олай”.
“Келгин, битта қучиб олай”.
Неварага куним қолди.

Чақирсам дарров дер “Лаббай”.
Хизматим қилар оғринмай.
Бўйидан ўзим ўргилай.
Неварага куним қолди.

Узатсам нима қиламан?
Бошга ёстиқмас, биламан.
Бахтин осмондан кўраман.
Неварага куним қолди.

Муштдеккина бўлса ҳам, бор!
Кимлардир балки шунга зор.
Барчага бер, Парвардигор!
Неварага куним қолди.

Кашта тикишни ўргатдим.
Гуллар тўқишни ўргатдим.
Қуръон ўқишни ўргатдим.
Неварага куним қолди.

Қория қиз бўлса кошки.
Бахти тўкис бўлса кошки.
Мени эслаб юрса кошки.
Неварага куним қолди.
Шукр, Аллоҳ уни берди.

Мастура хожи она

@sheriat_olami