* * *
...Ko‘zim jiqqa yoshga to‘ldi tunov kun,
Zim-ziyo tundan ham qaro yuragim.
Ichimda hasratim uzundan-uzun,
Ey odam, to‘xtagin, yetar endi, jim...

Borliq o‘t ichida, xo‘sh, nima uchun,
Miltillagan cho‘g‘ni puflayotgan kim?!
Yo asir etdimi ko‘rinmas afsun,
Dilimda g‘am – zardob chayqalar lim-lim...

Yog‘ayotgan qormas, ajal o‘qi u,
Ariqdagi suvmas, shahidlar qoni.
Toptalar adolat atalgan tuyg‘u,
G‘aflatdan qo‘pmasmi dunyo imoni?...

Go‘daklar faryodi o‘rlaydi ko‘kka,
Onalar ko‘ksiga urib yig‘laydi.
Hech kim achinmasmi sho‘rlik bo‘bakka,
Isyonkor qo‘lini, ayt, kim bog‘laydi?..

...Badtar urchib borar mudhish jinoyat,
To‘ng‘iz payhon qilar dalalaringni.
Inson deb atalgan zotga bu uyat,
Ona yer, tiyib qo‘y bolalaringni.

Razillar dastidan g‘ashlanma ko‘ngil,
Oldinda ularni kutar ming jazo.
Osoyishta kunlar qimmatini bil,
Yo‘q joydan chiqarma urush va g‘avg‘o.

Qon to‘kmoqlik ishi emasdir ermak,
Ish bitgach boshingni qilma axir xam.
Shaytonning qo‘liga aslo qo‘l berma,
Manfur kimsalarga yo‘l berma, Odam!

© O‘tkir Rahmat

#Bedorlik|@Otkir_Rahmat