Ўткир Раҳмат I O'tkir Rahmat

NOVDALARDA ERTAGI ERTAK...

Novdadagi yo xayolmisan,
Nigohlarga tushmas yo sirsan.
Bir kun kelib ko‘kka bosh ursang,
Bu dunyoda, demak, sen borsan.

Kulgularing ich-ichingdadir,
Quvonch-u g‘am olgan yo‘rgaklab.
Oqshom-kunduz endi sengadir,
Kelaverar har kuni yo‘qlab.

Sen tomonga orzumand bo‘lib,
Yuzlaringni izlar bo‘yoqlar.
Kipriklarda ko‘zyosh joy olib,
Yig‘latarmi yomg‘ir siyoqlar.

Balki tushlar ko‘rayotirsan,
Yashil olam ostonasida.
Terga botib balki yotursan,
Orzularning koshonasida.

Ishq mayog‘i yo‘lingni poylar,
Ko‘zlari to‘rt tuyg‘u jonsarak.
Kutayotir seni kun, oylar,
Aylanmoqda dunyo – charxpalak.

Bu behudud makon intizor,
Tezroq ko‘z och, qanotingni yoz.
Fevral o‘tib kelmoqda bahor,
Umr o‘tar fursat esa oz!..

Xayol kabi huzurbaxsh orom,
Ochilmagan sir-u sinoat.
Bir sharobki limmolimdir jom,
Sipqorsa, bas, bir ho‘plam faqat...

Sipqorsami uni ko‘hna dun,
Gurillab u ko‘taradi bosh.
Olam unga majnunvash kun-tun
Va bag‘riga bosar oy, quyosh!

O tasavvur, xayolday cheksiz,
Novdalarda ertagi ertak.
Qolarmikan undan biror iz...
O‘yga botib tipirlar yurak...

© O‘tkir Rahmat

#Qish_ilhomi| @Otkir_Rahmat

НОВДАЛАРДА ЭРТАГИ ЭРТАК...

Новдадаги ё хаёлмисан,
Нигоҳларга тушмас ё сирсан.
Бир кун келиб кўкка бош урсанг,
Бу дунёда, демак, сен борсан.

Кулгуларинг ич-ичингдадир,
Қувончу ғам олган йўргаклаб.
Оқшом-кундуз энди сенгадир,
Келаверар ҳар куни йўқлаб.

Сен томонга орзуманд бўлиб,
Юзларингни излар бўёқлар.
Киприкларда кўзёш жой олиб,
Йиғлатарми ёмғир сиёқлар.

Балки тушлар кўраётирсан,
Яшил олам остонасида.
Терга ботиб балки ётурсан,
Орзуларнинг кошонасида.

Ишқ маёғи йўлингни пойлар,
Кўзлари тўрт туйғу жонсарак.
Кутаётир сени кун, ойлар,
Айланмоқда дунё – чархпалак.

Бу беҳудуд макон интизор,
Тезроқ кўз оч, қанотингни ёз.
Февраль ўтиб келмоқда баҳор,
Умр ўтар фурсат эса оз!..

Хаёл каби ҳузурбахш ором,
Очилмаган сиру синоат.
Бир шаробки лиммолимдир жом,
Сипқорса, бас, бир ҳўплам фақат...

Сипқорсами уни кўҳна дун,
Гуриллаб у кўтаради бош.
Олам унга мажнунваш кун-тун
Ва бағрига босар ой, қуёш!

О тасаввур, хаёлдай чексиз,
Новдаларда эртаги эртак.
Қолармикан ундан бирор из...
Ўйга ботиб типирлар юрак...

© Ўткир Раҳмат

#Қиш_илҳоми| @Otkir_Rahmat

BU KECHA...
1
O‘zingga sig‘mayin turgan chog‘ingda,
Ko‘zingga ko‘rinar dunyo juda tor.
Qovrulib xayolan dil chirog‘ingda
Negadir chekasan ich-ichdan ozor.

Qalbingning nolasin payqamas axir,
Kechaning ko‘zlari qop-qora yumuq.
Yer-u ko‘k zim-ziyo unga baribir,
Yilt etgan madad ham atrofingda yo‘q.

Bu borliq talqonni og‘zida ushlab,
Tanho qolganingni anglamas hatto.
Qaysidir armonlar ko‘zingni yoshlab,
Ashkini yurakka etaverar jo...

Kunduzni uxlatib qorong‘ulikda,
Quvonch-u g‘amlarni yashirdimi tun?
Tonggacha ko‘rinmay u birgalikda,
Kecha-la umrini o‘tkazar uyg‘un...

Qop-qora soch kabi sochilgan kokil,
Borliqni yopgancha topgan xobini.
Ezilib-o‘rtanib yolg‘izlikda dil,
Kimga ham aytardi iztirobini...

Oh tortib ohingning quchog‘ida jim,
Eshikka tikilib umiding uyg‘oq.
Negadir ochmoqqa bormaydi qo‘lim,
Ne qilay tong yo‘li hali ko‘p yiroq...

2
Tanholik dardini kechirib boshdan,
Ortiga qaramay ketgandir oy ham.
Asrlar ko‘targan metin bardoshdan,
Kuch olib hamrohlik qilgan chiroy ham.

Yulduzlar sochilib ko‘kda turarkan,
To‘kilib ketgudek titroqda go‘yo.
Kimlarni bilmadim ular kutarkan,
Sirlarin oshkor ham etmaydi dunyo.

Sukunat hozircha bunda hukmron,
Mavh etgan borliqni oqshom uyqusi.
Qaydadir sarsondir yo‘l qarab hijron,
Qaydadir hajrning g‘amu qayg‘usi...

Qaydasan, ovoz ber, dil istar malham,
Marhamat, so‘ragin yuz ochsa shafaq.
Sen menga keraksan bilsang juda ham,
Ayama mehringni va ayla shafqat...

© O‘tkir Rahmat

#Qish_ilhomi| @Otkir_Rahmat

БУ КЕЧА...
1
Ўзингга сиғмайин турган чоғингда,
Кўзингга кўринар дунё жуда тор.
Қоврулиб хаёлан дил чироғингда
Негадир чекасан ич-ичдан озор.

Қалбингнинг ноласин пайқамас ахир,
Кечанинг кўзлари қоп-қора юмуқ.
Еру кўк зим-зиё унга барибир,
Йилт этган мадад ҳам атрофингда йўқ.

Бу борлиқ талқонни оғзида ушлаб,
Танҳо қолганингни англамас ҳатто.
Қайсидир армонлар кўзингни ёшлаб,
Ашкини юракка этаверар жо...

Кундузни ухлатиб қоронғуликда,
Қувончу ғамларни яширдими тун?
Тонггача кўринмай у биргаликда,
Кеча-ла умрини ўтказар уйғун...

Қоп-қора соч каби сочилган кокил,
Борлиқни ёпганча топган хобини.
Эзилиб-ўртаниб ёлғизликда дил,
Кимга ҳам айтарди изтиробини...

Оҳ тортиб оҳингнинг қучоғида жим,
Эшикка тикилиб умидинг уйғоқ.
Негадир очмоққа бормайди қўлим,
Не қилай тонг йўли ҳали кўп йироқ...

2
Танҳолик дардини кечириб бошдан,
Ортига қарамай кетгандир ой ҳам.
Асрлар кўтарган метин бардошдан,
Куч олиб ҳамроҳлик қилган чирой ҳам.

Юлдузлар сочилиб кўкда тураркан,
Тўкилиб кетгудек титроқда гўё.
Кимларни билмадим улар кутаркан,
Сирларин ошкор ҳам этмайди дунё.

Сукунат ҳозирча бунда ҳукмрон,
Мавҳ этган борлиқни оқшом уйқуси.
Қайдадир сарсондир йўл қараб ҳижрон,
Қайдадир ҳажрнинг ғаму қайғуси...

Қайдасан, овоз бер, дил истар малҳам,
Марҳамат, сўрагин юз очса шафақ.
Сен менга кераксан билсанг жуда ҳам,
Аяма меҳрингни ва айла шафқат...

© Ўткир Раҳмат

#Қиш_илҳоми| @Otkir_Rahmat

BAHORDA BULBUL HAM KUYLAGAN NAVO...

Ertakka aylanar ko‘rganlarimiz,
Nihol edi avval bo‘y cho‘zgan daraxt.
Birgalikda xayol surganlarmiz,
O‘sha ham bir zamon bo‘lgan ekan baxt.

Erkalab, o‘rgilib yurgan bu havo,
Qachondir ko‘nglimiz ko‘targan edi.
Bahorda bulbul ham kuylagan navo,
Qaysi bir butoqda o‘tirgan edi.

Bolajon keldingmi degan u ovoz,
Onamning sog‘inchi, bir mehri edi.
Otamning madadi baxsh etdi parvoz,
Dunyoning men bilmas bir sehri edi.

Kengliklar qo‘ynida nelar bermas yuz,
Goh yomg‘ir, qoriga bo‘ldik-ku guvoh.,
Ko‘klamdan yoz o‘tib kutib oldi kuz,
Gohida shod edik, g‘amda qoldik goh.

Kimlarni kuzatdik taqdir ekan deb,
Kipriklar namlanib ko‘zga to‘ldi yosh.
Aslida hayot ham shundaymikan deb,
Bariga ko‘nikib yuribdi bardosh.

Kechagi qizaloq bo‘y yetgan ko‘ngil,
Yigitcha ovozi qolgan do‘rillab.
Bir yoshga ulg‘ayib o‘tayotgan yil,
Kimga baxsh etgan ishq turibdi gullab...

Namxush hazonlarda ajir bir hovur,
Oftob yuzin bosar shomga qadar to.
Etagin tortqilab ketgunicha nur,
Uning quchog‘idan ayrilmas hatto.

Bog‘larning bag‘rida shamol huvillar,
Novdalar yalong‘och libosin yechgan.
Tush ko‘rib turganday bo‘lib tuyular,
Fasllar umri ham shu yerda kechgan...

Qachondir uchrashdik dil amri bilan,
Chamanzor, gullarning iforidan mast.
Hayot ham ertakka aylanar ekan,
Gohida ishonib, ishongim kelmas…

O, buncha shoshqaloq ekansan, umr,
Borini aytishga ulgurmaydi til.
Ne bo‘lsa bo‘lgani unga baribir,
Bizlardan so‘ramay o‘tib ketar yil.

Ertakka aylanar ko‘rganlarimiz,
Nihol edi avval bo‘y cho‘zgan daraxt.
Birgalikda xayol surganlarmiz,
O‘sha ham bir zamon bo‘lgan ekan baxt...

O‘sha ham bir zamon bo‘lgan ekan baxt…

© O‘tkir Rahmat

#Sog‘inch| @Otkir_Rahmat

БАҲОРДА БУЛБУЛ ҲАМ КУЙЛАГАН НАВО...

Эртакка айланар кўрганларимиз,
Ниҳол эди аввал бўй чўзган дарахт.
Биргаликда хаёл сурганлармиз,
Ўша ҳам бир замон бўлган экан бахт.

Эркалаб, ўргилиб юрган бу ҳаво,
Қачондир кўнглимиз кўтарган эди.
Баҳорда булбул ҳам куйлаган наво,
Қайси бир бутоқда ўтирган эди.

Болажон келдингми деган у овоз,
Онамнинг соғинчи, бир меҳри эди.
Отамнинг мадади бахш этди парвоз,
Дунёнинг мен билмас бир сеҳри эди.

Кенгликлар қўйнида нелар бермас юз,
Гоҳ ёмғир, қорига бўлдик-ку гувоҳ.,
Кўкламдан ёз ўтиб кутиб олди куз,
Гоҳида шод эдик, ғамда қолдик гоҳ.

Кимларни кузатдик тақдир экан деб,
Киприклар намланиб кўзга тўлди ёш.
Аслида ҳаёт ҳам шундаймикан деб,
Барига кўникиб юрибди бардош.

Кечаги қизалоқ бўй етган кўнгил,
Йигитча овози қолган дўриллаб.
Бир ёшга улғайиб ўтаётган йил,
Кимга бахш этган ишқ турибди гуллаб...

Намхуш ҳазонларда ажир бир ҳовур,
Офтоб юзин босар шомга қадар то.
Этагин тортқилаб кетгунича нур,
Унинг қучоғидан айрилмас ҳатто.

Боғларнинг бағрида шамол ҳувиллар,
Новдалар ялонғоч либосин ечган.
Туш кўриб тургандай бўлиб туюлар,
Фасллар умри ҳам шу ерда кечган...

Қачондир учрашдик дил амри билан,
Чаманзор, гулларнинг ифоридан маст.
Ҳаёт ҳам эртакка айланар экан,
Гоҳида ишониб, ишонгим келмас…

О, бунча шошқалоқ экансан, умр,
Борини айтишга улгурмайди тил.
Не бўлса бўлгани унга барибир,
Бизлардан сўрамай ўтиб кетар йил.

Эртакка айланар кўрганларимиз,
Ниҳол эди аввал бўй чўзган дарахт.
Биргаликда хаёл сурганлармиз,
Ўша ҳам бир замон бўлган экан бахт...

Ўша ҳам бир замон бўлган экан бахт…

© Ўткир Раҳмат

#Соғинч| @Otkir_Rahmat

YANGI O‘ZBEKISTON ASKARLARIMIZ

Tikilsang — ko‘z yetmas sarhading ulug‘,
Har qarich yeringda mardlarning shoni.
Cho‘qqilarni bo‘ylab xilpiragan tug‘ —
Momomning mehri u, bobom imoni.
Shu sabab tinmagay dil torlarimiz,
Yangi O‘zbekiston askarlarimiz!

Shiroq jasorati qalbimizda jo,
Har shiddati saboq Jaloliddinning.
Temur adolati bo‘libdi paydo —
Baxt-iqboli kuldi qo‘hna ochunning.
Shu qadim ma'vodir bizning borimiz,
Yangi O‘zbekiston askarlarimiz!

Ahdimiz bu dunyo turguncha turar,
Yonib asragaymiz sarhadlaringni.
Ko‘ksimizda yurak shu yurt deb urar,
Ko‘zga surtajakmiz dilxatlaringni.
Shu qadim oshyonning dilbandlarimiz,
Yangi O‘zbekiston askarlarimiz!

Olam chayqalsa-da turgaymiz sobit,
Biz ozodlik taraf, biz tinchlik tomon!
Sen bor ekansanki, baxtu iqbol but,
Vatan, yuksalaver, mangu bo‘l omon!
Shu qadim ona yurt farzanlarimiz,
Yangi O‘zbekiston askarlarimiz!

Shodmon bo‘lsin elim, bor bo‘lsin Vatan,
Mangu yo‘ldosh bo‘lsin oy ila oftob.
Yurtboshim cho‘qqilar sari ko‘z tikkan,
Olg‘a intilamiz, to‘xtamas shitob!
Bunyodkor xalqimiz suyanch tog‘imiz,
Yangi O‘zbekiston askarlarimiz!

Bu zamin har qarich tuprog‘i aziz,
Ko‘zlarga to‘tiyo, fido bo‘lsin jon.
Muqaddas, jonajon Vatandan hargiz,
Shon-u shavkatimiz ketmas hech qachon.
To abad shu yurtning posbonlarimiz,
Yangi O‘zbekiston askarlarimiz!

Yangi O‘zbekiston askarlarimiz...

© O‘tkir Rahmat

#Qutlov| @Otkir_Rahmat

ЯНГИ ЎЗБЕКИСТОН АСКАРЛАРИМИЗ

Тикилсанг — кўз етмас сарҳадинг улуғ,
Ҳар қарич ерингда мардларнинг шони.
Чўққиларни бўйлаб хилпираган туғ —
Момомнинг меҳри у, бобом имони.
Шу сабаб тинмагай дил торларимиз,
Янги Ўзбекистон аскарларимиз!

Широқ жасорати қалбимизда жо,
Ҳар шиддати сабоқ Жалолиддиннинг.
Темур адолати бўлибди пайдо —
Бахт-иқболи кулди қўҳна очуннинг.
Шу қадим маъводир бизнинг боримиз,
Янги Ўзбекистон аскарларимиз!

Аҳдимиз бу дунё тургунча турар,
Ёниб асрагаймиз сарҳадларингни.
Кўксимизда юрак шу юрт деб урар,
Кўзга суртажакмиз дилхатларингни.
Шу қадим ошённинг дилбандларимиз,
Янги Ўзбекистон аскарларимиз!

Олам чайқалса-да тургаймиз собит,
Биз озодлик тараф, биз тинчлик томон!
Сен бор экансанки, бахту иқбол бут,
Ватан, юксалавер, мангу бўл омон!
Шу қадим она юрт фарзанларимиз,
Янги Ўзбекистон аскарларимиз!

Шодмон бўлсин элим, бор бўлсин Ватан,
Мангу йўлдош бўлсин ой ила офтоб.
Юртбошим чўққилар сари кўз тиккан,
Олға интиламиз, тўхтамас шитоб!
Бунёдкор халқимиз суянч тоғимиз,
Янги Ўзбекистон аскарларимиз!

Бу замин ҳар қарич тупроғи азиз,
Кўзларга тўтиё, фидо бўлсин жон.
Муқаддас, жонажон Ватандан ҳаргиз,
Шону шавкатимиз кетмас ҳеч қачон.
То абад шу юртнинг посбонларимиз,
Янги Ўзбекистон аскарларимиз!

Янги Ўзбекистон аскарларимиз...

© Ўткир Раҳмат

#Қутлов| @Otkir_Rahmat

QISH SIMFONIYASI

Biz kezgan bogʼ bagʼri oqshom quchdi qor,
Oppoq libos ichra botdi dunyosi.
Zumrad havolarni sipqorib takror,
Izgʼirin shashtiga kelmas parvosi.

Kumush zarralarning jilosi sirli,
Аllalab qalbimga soladi junbish.
Аxir bu umrning kunlari turli,
Gohida bahor-u, gohi esa qish.

Sen qayda yuribsan jonim ayni dam,
Oq ukpar yopingan borliq mastona.
Gard inmas oqlikka oʼrangan olam,
Payt kelib kimgadir boʼlar afsona.

Chamanday gullagan daraxtlar yodda,
Yashnagan maysalar oshufta edi.
Bir baxtki qoʼl tutgan menga hayotda,
Entikib izlayman sogʼinib endi...

Uchqur xayollarim qoqadi qanot,
Yorugʼlik yoyilgan ufqqa qadar.
Tutguncha oqlikni yer-u koinot,
Bilmadim qay tomon bizni yetaklar.

Nurli umidimning sabri beadad,
Oq choyshab ostida nihon izimiz.
Vaqt kelib koʼkatlar koʼtarganda qad,
Biz yurgan yoʼllarga tushsa koʼzimiz...

Voajab! Oʼsha taft ufursa shunda,
Bu chaman, bogʼ ichra yurak telbavor...
Men seni esladim qor yoqqan kunda,
Bilasan bu qishning ertasi bahor!..

Biz kezgan bogʼ bagʼri oqshom quchdi qor,
Oppoq libos ichra uxlar dunyosi...

© Oʼtkir Rahmat

#Qish_ilhomi| @Otkir_Rahmat

ҚИШ СИМФОНИЯСИ

Биз кезган боғ бағри оқшом қучди қор,
Оппоқ либос ичра ботди дунёси.
Зумрад ҳаволарни сипқориб такрор,
Изғирин шаштига келмас парвоси.

Кумуш зарраларнинг жилоси сирли,
Аллалаб қалбимга солади жунбиш.
Ахир бу умрнинг кунлари турли,
Гоҳида баҳору, гоҳи эса қиш.

Сен қайда юрибсан жоним айни дам,
Оқ укпар ёпинган борлиқ мастона.
Гард инмас оқликка ўранган олам,
Пайт келиб кимгадир бўлар афсона.

Чамандай гуллаган дарахтлар ёдда,
Яшнаган майсалар ошуфта эди.
Бир бахтки қўл тутган менга ҳаётда,
Энтикиб излайман соғиниб энди...

Учқур хаёлларим қоқади қанот,
Ёруғлик ёйилган уфққа қадар.
Тутгунча оқликни еру коинот,
Билмадим қай томон бизни етаклар.

Нурли умидимнинг сабри беадад,
Оқ чойшаб остида ниҳон изимиз.
Вақт келиб кўкатлар кўтарганда қад,
Биз юрган йўлларга тушса кўзимиз...

Воажаб! Ўша тафт уфурса шунда,
Бу чаман, боғ ичра юрак телбавор...
Мен сени эсладим қор ёққан кунда,
Биласан бу қишнинг эртаси баҳор!..

Биз кезган боғ бағри оқшом қучди қор,
Оппоқ либос ичра ухлар дунёси...

© Ўткир Раҳмат

#Қиш_илҳоми| @Otkir_Rahmat

OPPOQ UCHQUNLАRI SOCHILGАN SOCHQI...

Qishdan yashirdimi bor bisotini,
Olib ketdi shamol, berdi tuproqqa.
Jilovin tortolmay uchqur otini,
Hayot aylanadi hamon chorboqda.

Daraxtlar oralab uxlagan sukut,
Qargʼalar dastidan orom topolmas.
Yalongʼoch novdalar boʼlganday unut,
Mingashib panjalar parvo ham qilmas.

Qorning havosimi chimchilar yuzni,
Oppoq uchqunlari sochilgan sochqi.
Borliq seskanmayin baxsh etgan oʼzni,
Ogʼochlar tik qotgan goʼyoki soqchi...

Joyini tark etmas sabr-u qanoat,
Kiyimi boʼlsa-da juda ham yupun.
Negadir bulbullar koʼrinmas faqat,
Qargʼalar ovozi hukmron bugun...

***
Oʼrtada mehrim bor har nedan aziz,
Bilib bilmaslikka olasan atay.
Magʼrurlik suqilib oʼrtaga beyuz,
Yaltoqlanib maqtov koʼkka koʼtargay.

Bogʼlangan qoʼl-oyoq maddoh dastiga,
U sudrab boradi kundan kun yiroq.
Ogʼriqlar yuragim olib qasdiga,
Shodlikmas yigʼini beradi koʼproq.

Hali oʼrganmagan koʼrgulik bunga,
Ishonchim tikilib uzmas koʼzini.
Taqdir olib kelgan bugungi kunga,
Negadir begona sezar oʼzini...

***
Yaqinmiz, voqifsan hamma bor sirdan,
Bariga guvohsan, koʼrib yuribsan.
Nogohon oʼzgarib aʼmoling birdan,
Tomoshabin boʼlib qarab turibsan...

Qanchalik istamay yetmaydi qoʼlim,
Ezgulik ahvoli tikilar nochor.
Manzilin topolmay ovora yoʼlim,
Yurakka pinhona beradi ozor.

Fursatlar parvosiz olib ketar bosh,
Mening borligimni eslolmas hatto.
Hammasiga axir berayapman-ku dosh,
Hayot, ayt, nega jim, befarqmisan yo?...

Omadni yoʼllaysan allakimlarga,
Niyatim ichida oqmaysan, hayot?
Ergashib qaysidir sen hukmlarga,
Аftoda qalblarga boqmaysan, hayot?

Umidvor dilimga bersang-chi quvvat,
Men seni notanti deb hech bilmasman.
Аdolat bor ekan dunyoda faqat,
Sen uchun begona boʼlgan emasman...

Umidvor dilimga bersang-chi quvvat...

© Oʼtkir Rahmat

#Qish_ilhomi| @Otkir_Rahmat

ОППОҚ УЧҚУНЛАРИ СОЧИЛГАН СОЧҚИ...

Қишдан яширдими бор бисотини,
Олиб кетди шамол, берди тупроққа.
Жиловин тортолмай учқур отини,
Ҳаёт айланади ҳамон чорбоқда.

Дарахтлар оралаб ухлаган сукут,
Қарғалар дастидан ором тополмас.
Ялонғоч новдалар бўлгандай унут,
Мингашиб панжалар парво ҳам қилмас.

Қорнинг ҳавосими чимчилар юзни,
Оппоқ учқунлари сочилган сочқи.
Борлиқ сесканмайин бахш этган ўзни,
Оғочлар тик қотган гўёки соқчи...

Жойини тарк этмас сабру қаноат,
Кийими бўлса-да жуда ҳам юпун.
Негадир булбуллар кўринмас фақат,
Қарғалар овози ҳукмрон бугун...

***
Ўртада меҳрим бор ҳар недан азиз,
Билиб билмасликка оласан атай.
Мағрурлик суқилиб ўртага беюз,
Ялтоқланиб мақтов кўкка кўтаргай.

Боғланган қўл-оёқ маддоҳ дастига,
У судраб боради кундан-кун йироқ.
Оғриқлар юрагим олиб қасдига,
Шодликмас йиғини беради кўпроқ.

Ҳали ўрганмаган кўргулик бунга,
Ишончим тикилиб узмас кўзини.
Тақдир олиб келган бугунги кунга,
Негадир бегона сезар ўзини...

***
Яқинмиз, воқифсан ҳамма бор сирдан,
Барига гувоҳсан, кўриб юрибсан.
Ногоҳон ўзгариб аъмолинг бирдан,
Томошабин бўлиб қараб турибсан...

Қанчалик истамай етмайди қўлим,
Эзгулик аҳволи тикилар ночор.
Манзилин тополмай овора йўлим,
Юракка пинҳона беради озор.

Фурсатлар парвосиз олиб кетар бош,
Менинг борлигимни эслолмас ҳатто.
Ҳаммасига ахир бераяпман-ку дош,
Ҳаёт, айт, нега жим, бефарқмисан ё?...

Омадни йўллайсан аллакимларга,
Ниятим ичида оқмайсан, ҳаёт?
Эргашиб қайсидир сен ҳукмларга,
Афтода қалбларга боқмайсан, ҳаёт?

Умидвор дилимга берсанг-чи қувват,
Мен сени нотанти деб ҳеч билмасман.
Адолат бор экан дунёда фақат,
Сен учун бегона бўлган эмасман...

Умидвор дилимга берсанг-чи қувват...

© Ўткир Раҳмат

#Қиш_илҳоми| @Otkir_Rahmat